В Атырау +2.8 
«Жұлдызды жол» және «Икс адамдар» франшизаларындағы рөлдері арқылы әлемге танылған аты аңызға айналған британдық актер сэр Патрик Стюарт 87 жасында қайтыс болды. Бұл туралы өнер иесінің Instagram желісіндегі ресми парақшасында хабарланды.
Отбасының мәлімдемесіне сәйкес, актер сәрсенбі күні Лос-Анджелестегі үйінде көз жұмған. Өлімге Альцгеймер ауруы мен Леви денешіктерімен байланысты деменцияның асқынуы себеп болған.
«Сэр Патрик Стюарттың өмірден өткенін терең қайғыра отырып хабарлаймыз. Ол отбасы мүшелері мен жақын достарының ортасында, олардың сүйіспеншілігіне бөленіп дүниеден өтті», — делінген ресми хабарламада.
Патрик Стюарттың шығармашылық жолы 70 жылға жуық уақытты қамтыды. Ол еңбек жолын Англия провинциясындағы әуесқой театр қойылымдарынан бастаған. Кейін Корольдік Шекспир компаниясының жетекші актерлерінің біріне айналып, Бродвей сахналарында өнер көрсетті.
Актерге әлемдік танымалдық пен миллиондаған көрерменнің сүйіспеншілігін «Жұлдызды жол: Келесі ұрпақ» сериалындағы капитан Жан-Люк Пикар және «Икс адамдар» фильмдер сериясындағы профессор Чарльз Ксавье рөлдері әкелді.
2010 жылы театр мен кино саласына сіңірген еңбегі үшін патшайым Елизавета II актерге рыцарь атағын берді.