В Атырау +4 
Қытайда Жапонияға ұшатын 12 бағыттағы 41 рейс тоқтатылды. Атап айтқанда, туристерге танымал Киото мен Осака қалаларына рейстер жойылған, деп хабарлайды INTERFAX South China Morning Post (SCMP) басылымына сілтеме жасап.
Сарапшылар апта бойы рейстердің одан әрі көбейіп тоқтатылуы мүмкін екенін болжайды.
Бұл жағдай Қытай мен Жапония арасындағы дипломатиялық даудың өршуіне байланысты. Жапония премьер-министрі Санаэ Такаити Тайвань мәселесіне қатысты мәлімдемелер жасаған. Ол Тайвань айналасындағы күш қолдану қаупі «Жапонияның қауіпсіздігіне қатер төндіруі мүмкін» деп мәлімдеген. Жапония мұндай жағдайда «құқықтық қорғанысқа» жүгінуі мүмкін екені айтылды.
Қытай билігі Тайвань мәселесін ішкі іс деп санап, Такаитиден осы мәлімдемелерден бас тартуды талап етті. Сонымен қатар, Пекин азаматтарына Жапонияға сапар шегуден аулақ болуды ұсынды, оқу мақсатымен бара жатқандарды да қауіпсіздікті ескеріп шешімін қайта қарауға шақырды.
Қытай сыртқы істер министрлігінің хабарлауынша, егер Такаити мәлімдемелерінен бас тартпаса, Пекин Жапонияға «қатаң әрі шешімді шаралар» қолданатын болады. Алайда Такаити өз позициясын өзгертуге ниет білдірмеген.