В Атырау +4 
Қазақстанда азаматтардың цифрлық құқықтарын қорғауға бағытталған жаңа Цифрлық кодекс әзірленіп жатыр. Құжатта адамның негізгі цифрлық құқықтарын қорғаудың құқықтық негізі белгіленеді.
Оған қол жеткізу құқығы, дербес деректердің құпиялылығы, цифрлық сәйкестендіру құқығы және ең маңызды жаңалықтардың бірі – «ұмыту құқығы», яғни интернетте қалдырылған цифрлық ізді жою мүмкіндігі кіреді.
Кодексте цифрлық ортада сәйкестендіру процедураларының қауіпсіздігі мен сенімділігіне баса назар аударылады. Бұл, әсіресе, биометриялық және көп факторлы аутентификация жүйелеріне қатысты. Электронды цифрлық қолтаңба бұрынғысынша жалғыз білікті қолтаңба нысаны мәртебесін сақтайды. Ал SMS кодтар, биометриялық деректер және басқа да жеңіл сәйкестендіру құралдары жоғары заңды маңызы жоқ операцияларда қолданылатын балама тәсілдер ретінде қарастырылады.
Жаңа кодекс электронды және цифрлық құжаттардың мәртебесін де нақтылайды. Енді электронды құжат түпнұсқамен тең болады және цифрлық қолтаңбамен расталады. Мұндай құжат жүйеден тыс пайдаланушы құрылғысында немесе сыртқы жадта сақталуы мүмкін. Сенімділікті арттыру мақсатында қосымша қауіпсіздік деңгейлері енгізіледі: қол қою кезінде құжаттың визуалды түрде көрсетілуі, жүктеу сайын қолтаңбаны міндетті тексеру және жоғары тексеру стандарттарын қолдану. Бұл шаралар электронды құжаттарды қағаз нұсқаларынан да қауіпсіз етуге мүмкіндік береді және жалған құжат жасаудың алдын алады.
Цифрлық құжат ұлттық анықтамалық деректер тізілімінде тіркелген сәтте түпнұсқамен теңестіріледі. Ал цифрлық ақпарат ұлттық тізілімдерден алынған заңды маңызды деректер ретінде танылады. Сонымен қатар, алғаш рет смарт-келісімшарттардың құқықтық режимі заңнамалық деңгейде бекітіледі.
Министрліктің мәліметінше, жаңа Цифрлық кодекс Қазақстан азаматтарының цифрлық кеңістіктегі қауіпсіздігін күшейтіп, дербес деректер мен онлайн әрекеттерге жауапкершілік пен сенімділікті арттыруға бағытталған.