Вокзалдағы дүрбелең

Бүгін, 24 қыркүйекте сағат 11-лер шамасында Атырау қаласының теміржол вокзалы ғимаратында дабыл жарияланды. Адамдар ғимараттан қауіпсіз жерге көшірілді.

Бұған анықтама бюросының маңында, көрінетін жерде қараусыз қалдырылған үлкен сөмке себеп болған. Бірнеше рет дауыс зорайтқыш арқылы хабарландыру берілгенмен, еш нәтиже болмады. Атырау облысының көлік прокуроры Болат ХАЛЫҚОВ хабарлағандай, осыдан кейін адамдарды вокзал ғимаратынан шығара бастаған. Мамандар сөмкеге тексеру жүргізіп, оның ішінен күмәнді ештеңе таппады. Ал, кешікпей, оның қожайыны, Өзбекстан азаматы да табылған.

Мұрат СҰЛТАНҒАЛИЕВ