В Атырау +4 
Қазақстанда мемлекеттік реттеуге жататын бірқатар дәрілік заттардың бағасы төмендеді. Бұл өзгеріс Денсаулық сақтау министрлігі енгізген жаңартылған баға белгілеу тетігінің нәтижесінде орын алды. Жаңа жүйе дәрі-дәрмек құнының ашықтығы мен болжамдылығын арттыруға бағытталған.
Қазіргі таңда 4994 саудалық атауға шекті баға бекітілген. Сонымен қатар, рецептсіз сатылатын 1707 препарат мемлекеттік реттеуден шығарылып, нарықтық бағалар бойынша тұрақты бақылауға алынған.
2025 жылы Медициналық және фармацевтикалық бақылау комитеті еліміздің 20 өңірінде дәрі бағасына мониторинг жүргізді. Зерттеуге вирусқа қарсы, қабынуға қарсы, бактерияға қарсы, жүрек-қантамыр және асқазан-ішек жолы ауруларына арналған ең сұранысқа ие 50 препарат енгізілді.
Қыркүйек айындағы деректерге сәйкес, маусыммен салыстырғанда дәрілердің 34%-ының бағасы (орта есеппен 7,8%) төмендеген. Қазан айында бұл көрсеткіш 50%-ға жетіп, орташа төмендеу 11,1%-ды құрады.
Бағасы айтарлықтай төмендеген препараттар қатарында: Гепар комп. Хеель, Ревмоксикам, Цефяпс, ВАЛМАК-Н, Зитмак. Бұл дәрілер халық арасында кеңінен қолданылады және түрлі ауруларды емдеуде маңызды рөл атқарады.
Комитет халықты сапалы әрі қауіпсіз дәрілермен әділетті бағамен қамтамасыз ету мақсатында нарықтағы үрдістерді талдап, баға мониторингін жүйелі түрде жалғастыруда.
Дәрі-дәрмек сатылымындағы заңбұзушылықтар туралы DariKZ және Naqty Onim мобильді қосымшалары арқылы немесе өңірлік департаменттерге хабарлауға болады.