В Атырау +4 
Катар Еуропалық Одақтың экологиялық саясатына байланысты Еуропаға сұйытылған табиғи газ (СТГ) жеткізуді тоқтатуы мүмкін. Бұл туралы Катардың энергетика істері жөніндегі мемлекеттік министрі Саад бен Шарида әл-Кааби Абу-Дабиде өткен ADIPEC конференциясында мәлімдеді.
«Біз бұл туралы өте анық айттық — [СТГ жеткізуді тоқтату мүмкіндігі бар екенін] мен бірнеше рет атап өттім», — деді министр, ЕО-ның экологиялық саясатты қатаңдату ықтималдығына байланысты сұраққа жауап бере отырып. Бұл туралы URA.RU хабарлады.
Әл-Каабидің айтуынша, нөлдік көміртек шығарындыларына жету мүмкін емес, ал ЕСG стандарттарына сай келмейтін компанияларға жылдық табыстың 5 пайызына дейін айыппұл салу туралы ЕО жоспары (2027 жылдан бастап күшіне енуі тиіс) Катардың Еуропаға СТГ жеткізуін толық тоқтатуға әкелуі мүмкін.
Бұған дейін Катар егер Еуропа тарапынан қысым жалғасса, баламалы нарықтарды іздеуге ниетті екенін де ескерткен.
Катар — дүниежүзіндегі табиғи газ қоры бойынша үшінші, ал АҚШ-тан кейінгі екінші ірі СТГ экспорттаушы ел. Эмираттың ұлттық мұнай-газ компаниясы 2030 жылға дейін өндіріс көлемін жылына 142 миллион тоннаға дейін арттыруды жоспарлап отыр.
Еуропалық Одақ бұған дейін 2028 жылға қарай ресейлік газдан толық бас тартуға дайын екенін мәлімдеген еді. Мысалы, Финляндия президенті Александр Стубб Ресейдің орнына Казахстанды баламалы энергия жеткізуші ретінде атаған болатын.
Ал Ресей тарапы бұған жауап ретінде Еуропа экономикасының күйреу қаупі мен энергия бағасының өсуі туралы ескерткен.