В Атырау +4 
Индер ауданының Көктоғай ауылындағы Б.Нысанбаев атындағы мектепке салынып жатқан 120 орындық жапсаржай құрылысы қарқынды жүргізілуде, - деп хабарлайды Өңірлік коммуникациялар қызметі.
Аталған нысанның бас мердігері – «Градстройсервис» ЖШС. Авторлық қадағалауды «General Project & Construction» ЖШС, ал техникалық қадағалауды «Әсем-Құрылыс-Қызылорда» ЖШС жүзеге асыруда.
Облыстық құрылыс, сәулет және қала құрылысы басқармасының басшысы Нұрберген Құсайыновтың айтуынша, жоба бойынша жұмыстар 2023 жылдың сәуір айында басталған. Кейін жобалық-сметалық құжаттамаға нақтылау және түзетулер енгізу қажеттілігі туындап, ол қайта қаралды. Сараптама қорытындысы алынғаннан кейін құрылыс жұмыстары 2024 жылы қайта жалғасты.
- Қазіргі таңда нысанда құрылыс жұмыстары бірқалыпты жүріп жатыр, мердігер мекемеге жұмыстың сапасын бақылауда ұстау және бекітілген кестеге сай мерзімінде аяқтау жөнінде нақты тапсырмалар берілді, - деді ол.
Жобаны қайта қарау кезеңіне байланысты нысанның аяқталу мерзімі кейінге шегерілген. Жоспар бойынша мектеп жапсаржайының құрылысы 2026 жылдың бірінші тоқсанында толық аяқталады деп күтілуде.