В Атырау +4 
Қазақстан Республикасы Ішкі істер министрлігінің бірінші орынбасары, полиция генерал-майоры Бауыржан Әленов бастаған делегация Вьетнам астанасы Ханойда өткен БҰҰ-ның киберқылмысқа қарсы конвенциясына қол қою рәсіміне қатысты, деп хабарлайды Polisia.kz.
Аталған конвенция ақпараттық-коммуникациялық технологиялар саласындағы қылмыстарға қарсы халықаралық ынтымақтастықты нығайтуға және жаһандық киберқауіпсіздікті арттыруға бағытталған.
Қазақстан өз мүдделерін қорғап, конвенция жобасын әзірлеу барысында мемлекеттер арасындағы өзара іс-қимылдың тиімді тетіктерін қалыптастыруға ұсыныстар енгізіп, белсенді жұмыс атқарды.
Конвенцияға қол қою Қазақстанның цифрлық қауіпсіздікті қамтамасыз ету, киберқатерлерге қарсы іс-қимылдың ұлттық жүйесін жетілдіру және басқа елдермен киберқауіпсіздік саласындағы әріптестікті нығайту саясатын іске асырудағы маңызды қадам болды.
Конвенцияға қосылу Қазақстанға мүмкіндік береді:
-
Басқа елдермен электрондық дәлелдемелерді жедел алмасуға;
-
Трансшекаралық киберқылмыстарды тергеу кезінде тиімді өзара іс-қимыл жасауға;
-
Азаматтарды интернет-алаяқтықтан, кибершабуылдардан және цифрлық қауіптерден қорғауға.