Тоқаев: Конституцияның 40-қа жуық бабына өзгеріс енгізіледі

Қазақстан Президенті Қасым-Жомарт Тоқаев Парламенттік реформаның аса маңызды екенін атап өтіп, Жұмыс тобының алғашқы отырысына қатысты пікір білдірді. 

Мемлекет басшысы өткен аптада арнайы Жұмыс тобын құру туралы Өкімге қол қойғанын еске салды. Отырыста Парламент, Президент Әкімшілігі, Үкімет, саяси партиялар, заңгерлер, ғалымдар және қоғам қайраткерлері қатысты.

Президенттің айтуынша, Парламенттік реформа ауқымды саяси жаңғырудың қисынына сәйкес кезең-кезеңімен жүзеге асырылады. Ол бір палаталы Парламентке көшу халықаралық тәжірибеге сай екенін атап өтті: әлем елдерінің үштен екісінде осындай парламенттік жүйе бар. Бір палаталы Парламентте партиялардың көп болуы саяси диалогты кәсіби негізде өрбітуге мүмкіндік береді, ал жаңа тәсілдер заң шығару үдерісін тиімді етеді.

Қасым-Жомарт Тоқаев реформаның Конституцияға және заңнамаға елеулі әсер ететінін мәлімдеді: негізгі заңның 40-қа жуық бабына өзгеріс енгізіледі, одан кейін кемінде 10 конституциялық заңға және 50-ден астам кодекс пен заңға түзетулер жасалады. Президент реформаның асығыстыққа жол бермей, мұқият дайындалу керектігін, барлық ұсыныстар мен пікірлер жан-жақты сарапталуы тиіс екенін айтты.

Сонымен қатар, мемлекет басшысы реформаның цифрландыру және электрондық үкімет бағытындағы дамуымен үйлесетінін, алдағы уақытта e-Parlament жүйесінің азаматтардың саяси өмірге араласуын жеңілдететінін атап өтті. Бұл жаңа жүйе заң қабылдаудың тиімділігін арттырып, популизмнің әсерін азайтады.

Парламенттік реформаның басты мақсаты – «Күшті Президент – ықпалды Парламент – есеп беретін Үкімет» саяси формуласына сәйкес өкілді билік тармағын түбегейлі жаңғырту. Тоқаев Сенатты тарату көзделмегенін, реформаның негізгі міндеті – азаматтардың мүдделері мен тілек-ниетін білдіретін заң шығарушы органды жаңа сипатқа жеткізу екенін жеткізді.

Жиынды Жұмыс тобының жетекшісі, ҚР Мемлекеттік кеңесшісі Ерлан Қарин жүргізді. Отырыста заң ғылымдарының докторы Виктор Малиновский, Мәжіліс депутаттары Үнзила Шапақ, Айдос Сарым, Никита Шаталов, Марат Бәшімов, «Ақжол» партиясының фракция жетекшісі Азат Перуашев, Amanat партиясының фракция жетекшісі Елнұр Бейсенбаев және саясаттанушы Андрей Чеботарев өз ой-пікірлерін білдірді.

Президент реформаның әр қадамын мұқият пысықтау қажеттігін, азаматтардың барлық ұсыныстарын есепке алу керектігін ерекше атап өтті. Ол Жұмыс тобына табыс тілеп, Парламенттік реформаның елдің саяси жүйесін жаңа деңгейге көтеретінін айтты.