Банкомат арқылы 500 мың теңгеден көп салғанда жіберушінің ЖСН-і сұралады

Қазақстанда банкомат арқылы картаға ақша салу ережелері қатаңдайды. Енді 500 мың теңгеден жоғары сома салынса, міндетті түрде жіберушінің ЖСН-ін көрсету қажет болады. Бұл туралы Үкімет отырысында Қаржы мониторингі агенттігі төрағасының орынбасары Қайрат Бижанов айтты.

Оның сөзінше, қазір қолданылып жатқан шараларға қарамастан, банкоматтар арқылы қолма-қол ақша шешу көлемі азаймай тұр. Себебі жіберуші мен алушыны нақты анықтамай-ақ аударым жасау мүмкіндігі бар. Көп жағдайда «өзгенің атына» ашылған карталар пайдаланылады.

Не өзгереді:

• картаға 500 мың теңгеден артық сома салынса, жіберушінің ЖСН-і көрсетілуі тиіс;
• операцияны қосымша мобильді қосымша немесе SMS арқылы растау тетігі қарастырылып жатыр;
• 2026 жылдың 1 қаңтарынан бастап банктер банкоматтағы бейнежазбаларды кемінде 180 күн сақтауға міндетті болады;
• бет-әлпетті немесе саусақ ізін танитын биометриялық жүйе енгізу де талқылануда.

ҚМА бұл шаралар күмәнді аударымдарға қатысқан адамдарды анықтауды жеңілдетіп, ақша жымқыру мен заңсыз әрекеттердің алдын алуға бағытталғанын атап өтті.