В Атырау +3 
Атырауда Ақсай, Ақжар ауылдары мен Жұлдыз ықшамауданын жалғайтын жолдың жөндеу жұмыстары екі айдан бері жалғасып келеді. Жол әлі күнге дейін жабық, ал жүргізушілер Жұлдыз бен Томарлы ықшамаудандарындағы ауыларалық жолдар арқылы айналып өтуге мәжбүр.
Бұл жағдай тұрғындарға үлкен қолайсыздық туғызып отыр. Себебі, бұл көшелер тар, кей жерлерде асфальт жоқ, ал өтетін көліктің саны өте көп.
– Таңертең және кешке мұнда көлік кептелісі болады. Көлік көп, ал көшелердің өткізу қабілеті төмен, – дейді тұрғындар.
Жабылған учаскедегі жөндеу жұмыстарының баяу жүруі де адамдардың наразылығын тудырып отыр.
– Күн сайын сол жерден өтеміз – кейде бір техника тұрады, кейде мүлдем бос болады, – дейді жүргізуші Әйгерім Орынбаева. – Соңғы аптада ешқандай ілгері жылжыған жұмыс байқамадым.
Көктем ықшамауданының тұрғыны Айымгүлдің айтуынша, жағдай уақыт өткен сайын жүйкені тоздырып тұр:
– Ешкім жұмыстың қашан аяқталатынын түсіндірмейді. Жұмыстың бәрін жаз бойына созып жатқандай әсер қалдырады. Иә, мүмкін олардың белгіленген кестесі бар шығар, бірақ техника жетіспейді. Күз жақындап келеді, қазір бағана болып тұрған шаң ертең батпаққа айналады.
«Ақ Жайық» редакциясы жұмыстың не себепті созылып жатқанын, оның қашан аяқталатынын және қолайсыздықты азайту үшін қандай шаралар қабылданып жатқанын түсіндіруді сұрап, қалалық әкімдікке ресми сауал жолдады. Алайда, екі аптадан астам уақыт өтсе де, жауап әлі күнге дейін келген жоқ.
Билік өкілдері үндемей жатқанда, күн сайын жол кептелісінде тұрғындардың уақыты зая кетіп, жүйкесі тозып жатыр.
Айгүл МАНСҰРОВА