​Атырауда қайтадан күкіртсутегі деңгейі асып кеткен жағдай тіркелді

17 шілдеге қараған түні сағат 00:00-ден 09:00-ге дейін газдың концентрациясы жекелеген аудандарда нормадан 1-5,2 есе асып кетті.

Міне, асып кеткен учаскелер:

• №103 «Шағала» — 7 жағдай; 
• №109 «Восток» — 7 жағдай;
• №110 «Привокзальный» — 11 жағдай; 
• №111 «Жилгородок» — 6 жағдай; 
• №112 «Әкімдік» — 12 жағдай; 
• №113 «Авангард» — 4 жағдай; 
• №114 «Загородная» — 11 жағдай; 
• «Химпоселок» — 1 жағдай.

Қала тұрғындарынан жағымсыз иіске байланысты көптеген шағымдардың түсуіне байланысты экология департаменті мен Қазгидрометтің облыстық филиалының мамандары 17 шілде күні ауаға өлшем жасады, деп хабарлады экология департаменті.

Нәтижесі алаңдатып отыр:

• «Квадрат» булану алаңында күкіртсутегі нормасының 22 есе асып кеткені тіркелді; 
• Канализацияның бас сорғы станциясында (КОС) — 5 есе асып кетті.

Осыған байланысты экология департаменті тұрғын үй массивтерінің аумағында ауаның ластануына жол берген "Атырау Су Арнасы" МКК-ға қатысты тексеру жүргізді. Тексеру нәтижесінде кәсіпорын ҚР Әкімшілік құқық бұзушылық туралы кодексінің 425-бабы бойынша әкімшілік жауапкершілікке тартылды.

Жинақталған материалдар одан әрі шара қабылдау үшін Атырау облысының санитариялық-эпидемиологиялық бақылау департаментіне жіберілді деп қосты ведомство өкілдері.

Айгүл МАНСУРОВА