В Атырау 0 
Атырау облысында білім беру инфрақұрылымын жаңғырту жалғасып жатыр. Өңірде «Реновация» жобасы аясында биыл 9 мектепке күрделі жөндеу жүргізілуде. Бұл – 2025-2027 жылдарға жоспарланған үш жылдық жаңғырту бағдарламасының алғашқы кезеңі, деп хабарлайды Өңірлік коммуникациялар қызметі.
Облыстық білім беру басқармасының бас маманы Абылай Ережептің айтуынша, қазіргі таңда 7 мектепте жөндеу жұмыстары басталған. Қалған 2 мектеп бойынша жобалық-сметалық құжаттамалар әзірленіп, конкурс рәсімдері жүргізілуде. – Жөндеу облыстың барлық ауданын қамтып отыр және белгіленген кестеге сәйкес жүзеге асырылуда, – деді ол.
Атырау қаласында Ә.Жангелдин атындағы және №9 Ш.Уәлиханов атындағы мектептерде күрделі жөндеу жұмыстары жергілікті бюджет есебінен қолға алынған.
Мақат ауданындағы Ораз Сарғұнанов пен Абай Құнанбаев атындағы мектептерде құрылыс жұмыстары «Ауыл – Ел бесігі» бағдарламасы аясында жүргізілуде.
Сонымен қатар Индер, Жылыой, Махамбет және Құрманғазы аудандарындағы бірқатар мектептерде де құрылыс қарқыны жоғары. Мәселен, Жылыой ауданындағы №19 орта мектептегі жөндеу жұмыстары 95%-ға, Абай Құнанбаев атындағы мектептегі жөндеу 90%-ға орындалған. Қос білім ұясы биылғы тамыз айында пайдалануға беріледі деп күтілуде.