​Атырауда күн қатты қызады

Атырау облысында шілде айында ауа температурасы климаттық нормадан жоғары болады. Бұл туралы «Қазгидромет» РМК АОФ мәліметіне сүйеніп, Өңірлік коммуникациялар қызметі хабарлады.

«Қазгидромет» РМК АОФ ауа-райын болжау бөлімінің басшысы Айна Қазғұлованың аутынша, айлық орташа температура +26,9°С пен +29,1°С аралығында болмақ. Бұл көрсеткіш көпжылдық орташа мәннен шамамен 1°С жоғары (қалыпты көрсеткіш: +25,6°С - +27,9°С).

- Шілде айының екінші және үшінші онкүндігінде күн қатты ысиды. Ауа температурасы +38°С-тан +43°С-қа дейін көтеріледі деп күтілуде. Түнгі уақытта да қатты салқын болмайды — түнгі ауа температурасы +22°С пен +27°С аралығында сақталады, – деп нақтылады синоптик маман. 

Ауа райының күрт ысуына байланысты мамандар, әсіресе, күннің ыстығына сезімтал жандарды — балаларды, қарттар мен созылмалы ауруы бар тұрғындарды барынша сақтыққа шақырады.

- Ауа температурасының жоғарылауы ағзаның тез шаршауына, қан қысымының көтерілуіне және жүрек-қан тамырлары жұмысының әлсіреуіне әкелуі мүмкін. Осы кезеңде тұрғындар көлеңкеде жүріп, бас киім киіп, сұйықтықты көп мөлшерде тұтынуы тиіс. Күннің ең қызған уақыты – сағат 11:00 мен 17:00 аралығында далада ұзақ болудан аулақ болған жөн, – дейді Атырау облыстық Денсаулық сақтау басқармасының штаттан тыс бас терапевті Мейіргүл Кенжеғалиева.

Сондай-ақ мамандар бұл кезеңде ресми дереккөздерден ауа райына қатысты ақпаратты бақылап, қауіпсіздік шараларын сақтауға шақырады.