Кремль: Ресей ешқашан Әзірбайжанға қауіп төндірген емес

Ресей Әзірбайжанға қауіп төндірген емес, Екатеринбургтегі жағдайдың басты себебі – «қылмыстарды» әшкерелеуге бағытталған әрекеттер, олардың қатарында әзірбайжан азаматтарына қарсы жасалған қылмыстар да бар, деп хабарлайды АА.

Бұл туралы 2 шілде, сәрсенбі күні Ресей президентінің баспасөз хатшысы Дмитрий Песков Екатеринбургтегі оқиғаларға байланысты Ресей мен Әзірбайжан арасындағы шиеленіс туралы пікір білдіре отырып айтты.

— Ресей ешқашан Әзірбайжанға қауіп төндірмеген және төндірмейді. Бұл оқиғаның басты себебі – тергеу шаралары, оның ішінде Ресей аумағындағы әзірбайжан азаматтарына қарсы қылмыстарды ашуға бағытталған жұмыстар. Бірақ, әрине, Киев режимі бұл жағдайды түрліше бұрмалап, шиеленісті күшейтуге тырысып жатыр, — деді Песков ресейлік мемлекеттік БАҚ-қа.

Ол бұл мәлімдемені Украина президенті Владимир Зеленский мен Әзірбайжан президенті Ильхам Әлиев арасындағы байланыстар жайлы сұраққа жауап ретінде айтты. Кремль өкілінің пікірінше, Украина қазіргі таңда Әзірбайжанды эмоциялық әрекеттерге итермелеуге тырысып отыр.

Песков сондай-ақ Ресей Әзірбайжанда ұсталған азаматтарының құқықтарын қорғау үшін барлық дипломатиялық құралдарды пайдаланатынын атап өтті.

— Біз видеокадрларды мұқият қарап шықтық, барлық егжей-тегжейге назар аудардық. Ресей азаматтарының заңды мүдделерін қорғау үшін дипломатиялық арналарды, бар мүмкіндігімізді пайдаланамыз, — деді ол.

Оның айтуынша, Ресей Федерациясы Тергеу комитетінің төрағасы Александр Бастрыкин мен Әзірбайжан Бас прокуроры Кямран Әлиев арасында тұрақты байланыс орнаған. Қазіргі уақытта екі тарап проблемалық мәселелерді талқылап жатыр.

1 шілде күні Әзірбайжанның Ресейдегі елшісі Рахман Мустафаев Ресей Сыртқы істер министрлігіне шақырылып, Әзірбайжан тарапынан Екатеринбургте әзірбайжан азаматтарының өлімі мен қатыгездікпен ұрып-соғылуына байланысты наразылық нотасы тапсырылды.

Әзірбайжан тарапы бұл жағдайды Ресей заңнамасы мен халықаралық құқықтың бұзылуы ретінде бағалап, оқиғада этникалық төзімсіздік белгілері байқалғанын атап өтті. Сонымен қатар, ресейлік БАҚ-та мұндай рейдтердің біржақты сипатта берілуіне де алаңдаушылық білдірілді.

Сол күні Әзірбайжан Мәдениет министрлігі ресейлік ұйымдармен жоспарланған барлық мәдени шараларды тоқтатқанын мәлімдеді. Сондай-ақ, Әзірбайжан Парламенті делегациясы Ресеймен арадағы парламенттік комиссия отырысына қатысудан бас тартты.

1 шілде күні Әзірбайжан ІІМ «Sputnik Әзірбайжан» кеңсесіне рейд жасап, жеті қызметкерді ұстады. Бұл әрекетке жауап ретінде Ресей СІМ Бакудегі ресейлік журналистердің дереу босатылуын талап етіп, әзірбайжан елшісіне вербалды нота тапсырды.

2 шілде күні Әзірбайжан Бас прокуратурасы Екатеринбургтегі қылмысты ашу үшін барлық заңды тетіктерді пайдаланатынын мәлімдеді.