В Атырау +1 
Бұрынғы ядролық полигоннан бірнеше шақырым жерде орналасқан Азғыр ауылында әлі күнге дейін жарық пен ауызсу мәселесі шешілмей келеді.
Атырау облысының әкімі Серік Шәпкеновтың айтуынша, жақын арада ауыл тұрақты электр желісіне қосылады. Қазір мұнда жарық жиі өшіп, оны қалпына келтіру апталарға созылады.
- Жарық бірнеше күн болмай қалады, ал ақауларды жөндеу кешігіп жүргізіледі. Осы мәселені шешу үшін жаңа энергетикалық жоба іске асырылуда, — деді ол.
Оның айтуынша, Азғырды тұрақты электр желісііне қосып, электр қуатын сенімді жеткізуге мүмкіндік беретін инфрақұрылым жобаланып жатыр.
Су мәселесі бақылауда
Ауыл халқын қамтамасыз етіп отырған «Қоянды» қабатындағы жерасты суының қоры азаюы мүмкін. Осыған байланысты билік өкілдері болашақта су тапшылығын болдырмау үшін қосымша су көздерін іздеуді бастап кетті.
Сонымен қатар, ауылдан тұрғындардың — әсіресе жастар мен еңбекке қабілетті тұрғындардың жаппай көшіп кетуі де өзекті мәселе болып отыр. Бұл үрдісті тоқтату үшін ауылда газ тартылып, әлеуметтік және инженерлік инфрақұрылым құру жұмыстары қолға алынған.
— Адамдар қалауы үшін өмір сүруге барлық жағдайды жасау қажет. Біз мұны түсінеміз және осы бағытта жұмыс істеп жатырмыз, — деді Шәпкенов.
Анықтама
Азғыр — Атырау облысында орналасқан шағын ауыл. Ол осы аттас бұрынғы ядролық сынақ полигонынан шамамен 7 шақырым жерде орналасқан. 1966–1979 жылдар аралығында бұл жерде 17 жерасты ядролық жарылыс жасалған. Сынақтар тоқтағанына көп жыл өтсе де, олардың экологиялық және инфрақұрылымдық зардаптары әлі де сезіледі.
Айгүл МАНСУРОВА