В Атырау +4 
Атырау қаласында таза энергияны дамытуға бағытталған маңызды жоба жүзеге асырылды. «ҚазМұнайГаз» ҰК АҚ-ның еншілес ұйымы — «ҚМГ Инжиниринг» ЖШС базасында «жасыл» сутекті өндіретін пилоттық жобаның бірінші кезеңі аяқталды. Бұл жоба қазақстандық Green Spark компаниясымен бірлесіп жүзеге асырылды.
«Жасыл» сутек жаңартылатын энергия көздерінен, атап айтқанда күн сәулесінен өндіріліп, атмосфераға зиянды газдар шығармайды. Өндіріс барысында жалғыз жанама өнім — таза су бөлінеді.
Бірінші кезеңде 336 фотоэлектрлік панель орнатылып, жалпы қуаты 200 кВт болатын күн электр станциясы іске қосылды. Бұл қуат бірнеше ондаған пәтердің электрмен қамтамасыз етілуіне тең. Қондырғы экономикалық тиімділігін дәлелдеп, жыл сайын электр энергиясына кететін шығынды шамамен 12 млн теңгеге азайтты.
Жобаның келесі кезеңінде электролизер орнатылады — бұл құрылғы күн панельдерінің энергиясымен суды оттегі мен таза сутекке бөледі. Осылайша, күн энергиясын өндіруден бастап, сутекті өндіру мен оны зертханалық корпус ішін жылытуға пайдалану кезеңдері біріктіріледі.
Бұл пилоттық жоба қазақстандық ғалымдарға батыс өңірлердегі нақты жағдайларда сутегі энергетикасы саласындағы технологияларды сынауға мүмкіндік береді. Сонымен қатар, ол 2060 жылға дейінгі төмен көміртекті даму бағдарламасын жүзеге асыру аясында ҚазМұнайГаз компаниялар тобының басқа нысандарында технологияны кеңінен қолдануға жол ашуы ықтимал.