«Мені өз үйімнен қуғысы келеді»: көпбалалы Атырау тұрғыны әкесімен соттасуда

2025 жылдың 17 сәуірінен бастап қалалық сотта Жеңіс Бисеновтың әкесінің шағымы қаралуда — ол ұлын, оның бес баласын, мүгедек әйелін, анасы мен қарындасын тұрып жатқан үйден шығарып жіберуді талап етіп отыр. Сот шешімі оның пайдасына шешілсе, отбасы далада қалуы ықтимал.

Жеңістің айтуынша, ол үйді кәмелет жасқа толмаған кезде өз қолымен салған. Бірақ 2011 жылы, ол 18 жаста толмаған кезде, үй анасының атына рәсімделген. Ата-анасы ресми түрде ажыраспағанымен, бөлек тұрған. Кейін үй жұбайлардың ортақ мүлкі деп танылып, әкесі өз үлесін алған. Сол себепті әкесі ұлы мен оның отбасының үйден шығарылуын талап еткен.

– Ақшам жоқ. Егер үйден кет десе, сот ғимаратында қаламын. Басқа барар жерім жоқ, – дейді Жеңіс.

Ол бала кезінде әкесінен қатты жапа шеккенін айтады. Төрт жасында соққыдан жарақат алған, 12 жасынан бері эпилепсиямен ауырады. Бұл факт сот тарапынан 2024 жылдың 30 желтоқсанында расталған.

Жеңіс соттың әділ өтетініне сенімсіздік білдіреді. Сот отырыстары біресе кейінге қалдырылады, біресе онлайн форматқа ауыстырылады да, бұл туралы нақты хабарламайды. Соңғы жағдай кеше болды: оған соттың сағат 12-де басталатыны хабарланған, бірақ онлайн қосылу сағат 11:27-де, ол жолда жүрген кезде басталған. Оның айтуынша, ол сотқа көзбе-көз қатысқысы келген.

- Судья не болып жатқанын түсіндірмейді. Оның әрекеттеріне қатысты шағымымды екі рет сот төрағасына жолдадым, бірақ жауап алған жоқпын. Керісінше, енді шағымдарым үшін жауапқа тартамыз деп қорқытады. Егер сотқа сене алмасақ, кімге сенеміз? — дейді ол.

Сот процесін судья Найля Тұрғамбаева жүргізіп жатыр. Әзір шешім шығарылған жоқ.

«Ақ Жайық» редакциясы жағдайға араласуды қажет деп тауып, Атырау облыстық сотының баспасөз қызметіне ресми сауал жолдады. Біз мынаны анықтағымыз келеді:

• Неліктен сот отырыстарының уақыты алдын ала хабарланбастан өзгертіледі?

• Судья шынымен шағымдар үшін жауапқа тартамын деп қорқытқан ба?

• Жеңістің өтініштері сот төрағасы тарапынан қаралды ма? Егер қаралса, қандай шаралар алынды?

Сонымен бірге, талапкердің әкесінің пікірін және соттың ресми шешімін де күтеміз.

Айнұр САПАРОВА