В Атырау -3 
АҚШ президенті Дональд Трамп Лос-Анджелестегі наразылардың әрекеттерін қатты айыптап, олардың ұлттық символдарға және қоғамдық тәртіпке құрметсіздік көрсетіп жатқанын мәлімдеді, деп хабарлайды АА.
«Олар басқа елдердің туын мақтанышпен ұстайды, бірақ өзіміздің туымызды өртеуде. Америка туын өртегендер бір жылға түрмеге отырғызылуы тиіс», — деді Трамп Солтүстік Каролинадағы әскери базадағы жиында.
Президенттің айтуынша, Калифорния билігі тәртіпті ұстай алмай отыр, сондықтан ол Лос-Анджелеске Ұлттық гвардияның мыңдаған сарбаздарын жіберген. Ол Калифорния губернаторын да «біліксіз» деп атады.
«Калифорнияда болып жатқан жағдай — бұл бейбітшілік пен тәртіпке және еліміздің тәуелсіздігіне қауіп. Ту ұстап жүрген шетелдік белсенділер біздің елді басып алғысы келеді. Біз бұған жол бермейміз», — деді Трамп.
Сондай-ақ ол Лос-Анджелесте заңсыз жүрген мигранттарды ұстайтынын айтты. «Лос-Анджелесті тазалаймыз», — деді.
Президент 14 маусымда Вашингтонда армияның 250 жылдығына арналған үлкен парад өтетінін еске салды.
«Біз Бірінші дүниежүзілік соғыста жеңдік. Егер АҚШ болмаса, сіздер бүгін неміс пен жапон тілдерінің араласқан тілін сөйлейтін едіңіздер. Бірақ біз жеңдік», — деді Трамп.
Лос-Анджелесте Иммиграция мен кеден полициясы ұстаған заңсыз мигранттарды қолдау үшін наразылықтар жүріп жатыр. Көп адам ұсталып, полициямен жанжалдар болады.
Трамп бұған дейін тәртіп орната алмаған қала әкімдігі мен губернаторды айыптап, жағдайды тұрақтандыру үшін Ұлттық гвардияны жұмылдырған.