Нетаньяху Газаны толық басып алу ниетін мәлімдеді

Израиль премьер-министрі Биньямин Нетаньяху Газаның бүкіл аумағын толық бақылауға алу жоспарын жариялады, деп хабарлайды АА.

Бұл мәлімдеме Израиль үкіметінің Газа секторына азық-түліктің шектеулі көлемін жеткізу туралы шешімінен кейін жасалды.

Нетаньяху видеоүндеуінде: "Біз Газа секторын толық бақылауға аламыз" деп мәлімдеді.

Оның айтуынша, гуманитарлық көмекті өткізу туралы шешім аймақтағы жағдайдың шиеленісуіне байланысты қабылданған. Ол: "Біз қауіпті шекке жақындап келеміз, егер бақылауды жоғалтсақ, бәрі күйрейді" деп атап өтті.

Нетаньяху сондай-ақ: "Біз Газа секторында аштықтың болуына жол бермеуіміз керек – бұл әрі практикалық, әрі саяси тұрғыдан маңызды. Егер бұған жол берсек, бізді ешкім қолдамайды" деп мәлімдеді.