Атыраудағы жаңарту бағдарламасы: 93 үй апатты деп танылды

Жақында Атырау облыстық әкімдігінде қаланың тұрғын үй қорын жаңарту мәселелері бойынша жұмыс кеңесі өтті. Қалалық әкімдіктің мәліметінше, бағдарлама аясында Атырауда 225 көпқабатты үйді сүру жоспарлануда. «Ақ Жайық» редакциясы 2025 жылы сүрілуге жататын үйлер тізімін ұсыну туралы ресми сұраныс жолдаған еді.

Біз нақты мекенжайлары көрсетілген тізімді, сондай-ақ апатты және тозығы жеткен ғимараттардың тізімін сұрадық. Реновация аясында 225 тұрғын үйдегі 3 395 пәтердің тұрғындарын көшіру жоспарлануда. Олардың 69-ы тозығы жеткен ғимараттар деп танылған. 2023-2025 жылдар аралығында 12 көпқабатты үйден 154 пәтердің тұрғындары қоныс аударды.

Сұранысқа Атырау қаласы әкімінің орынбасары Тілек МАХУОВ жауап берді. Ол реновация жобаларын қаржыландыру жергілікті бюджет пен жеке инвесторларды тарту арқылы жүзеге асырылатынын хабарлады.

- Қаланың тұрғын үй қорын жаңарту бағдарламасы аясында меншік иелерімен келісім бойынша және құрылыс аяқталғаннан кейін оларға жаңа пәтерлерді кепілдікпен беру арқылы бұзылатын тұрғын үйлердің орнына жеке инвесторлар жаңа көпқабатты тұрғын үйлерді салуды қарастырады. Бұл ретте барлық іс-шаралар бұзылатын үйлердің иелері мен жеке инвесторлар арасындағы екіжақты келісімдер негізінде жүзеге асырылады, – деп түсіндірді Махуов.

Оның айтуынша, қазіргі уақытта әкімдік апатты және ескі үйлердің тұрғындарын көшіру мәселесін шешу үшін әлеуетті инвесторлармен келіссөздер жүргізуде. Осыған байланысты биылғы жылы бұзылатын ғимараттардың нақты мекенжайлары әлі анықталмаған.

- Осыған байланысты биыл реновация бағдарламасы аясында бұзылатын тұрғын үйлердің нақты мекенжайларын ұсыну мүмкін емес, – деп жауап берді әкім орынбасары.

Дегенмен, редакцияға бұзылуға жататын апатты үйлердің жеке тізімі берілді. Қазіргі уақытта мұндай нысандардың саны - 93. Бұл үйлер реновация бағдарламасына енгізілуі мүмкін. Қалалық тұрғын үй-коммуналдық шаруашылық бөлімінің мәліметінше, бағдарламаға енгізілген ғимараттар тізімі өзгеріссіз қалып отыр.

Бұған дейін әкімдік баспасөз қызметі хабарлағандай, Атырау қаласының әкімі Шакир КЕЙКИН реновацияға жүйелі тәсіл қолдану үшін қаланың тұрғын үй массивтерін шартты түрде бес негізгі аймаққа бөлу туралы ұсыныс жасады. Оларға мыналар кіреді:

• Мұса Баймұханов көшесі;
• Орталық ықшамаудан және Азаттық даңғылы;
• Жилгородок;
• Азаттық даңғылы – Мұхтар Әуезов көшесі;
• Балықшы ықшамауданы.

Ең ескі үйлер С. Датов, М. Баймұханов, Г. Қожақаев, А. Стаханов көшелерінде, сондай-ақ Азаттық, М. Әуезов және Бейбітшілік даңғылдарында орналасқан. Негізінен, бұл 16 пәтерлік екі қабатты үйлер.

Бағдарламаны жеделдету үшін облыс әкімі тең жауапкершілік механизмін ұсынды: әкімдік ескі ғимараттарды бұзу және учаскелерді дайындау жұмыстарын өз мойнына алады, ал құрылыс салушылар бюджет қаражатын өтеп, жаңа тұрғын үйлердегі пәтерлерді кезекте тұрған азаматтарға береді.

Атырау облысының әкімі Серік ШӘПКЕНОВ  реновацияны жеделдету үшін әкімдік, тұрғындар және құрылыс компаниялары арасында үшжақты келісімдер жасасу арқылы арнайы бағдарлама әзірлеуді тапсырды. Бұл келісімдерде құрылыс кезеңінде тұрғындарға уақытша баспана беру қарастырылған.

- Ескі ғимараттардың орнына ойластырылған архитектурасы бар, абаттандырылған аумақ пен қажетті әлеуметтік инфрақұрылымы қамтылған заманауи тұрғын үй кешендері салынуы тиіс. Тығыз құрылыс пен «құмырсқа илеуі» тәрізді үйлерден аулақ болу қажет. Өзінің бұрынғы орнына қайта оралғысы келетін тұрғындарға уақытша баспана қарастыру керек, – деп атап өтті облыс әкімі.

Айнұр САПАРОВА