Шоқпартоғай ауылындағы бөгеттің құрылыс жұмыстары тоқтатылды

Жылыой ауданындағы ауылда экскаваторшы адамның бас сүйегін тапқаннан кейін қазу жұмыстары тоқтатылды.

Әлеуметтік желілерде таралған видеода экскаватор жүргізушісі адамның бас сүйегін көрсетіп, оны карьердің оңтүстік-шығыс шетінде жер қазу жұмыстары кезінде тапқанын айтады. 

Жергілікті тұрғындар бұл аймақтың ежелгі сармат қорғандарымен байланысты екенін айтып, кез келген қазба жұмыстарын дереу тоқтатуды талап етті. Кейбіреулер тіпті рухани тұрғыдан алаңдаушылық білдіріп, «ата-бабалардың аруағы кешірмейді» деген пікірлерін жеткізді.

Облыста бұған дейін де осындай жағдайлар болған. Өткен жылы Құрманғазы ауданының Кудряшово ауылында жер қазу кезінде көмілген белгісі жоқ адамның бас сүйегі табылған. Ал Махамбет ауданында Жайық бойынан бөгет салу кезінде ондаған сүйек пен бас сүйегінің сынықтары табылды.

Атырау облысының тарихи-мәдени мұраларды зерттеу орталығы бұл жағдайды растады:

"Біздің мамандар оқиға орнына барды. Шоқпартоғай маңында тарихи-мәдени ескерткіштер тізіліміне енген нысан тіркелмеген. Тексеру барысында археологиялық құндылығы анықталмады. Алайда жұмыс уақытша тоқтатылды", - делінген ресми жауапта.

Орталық мамандары кез келген жер қазу жұмыстары басталмас бұрын археологиялық сараптама жүргізу қажеттігін еске салды. Бұл талап ҚР «Тарихи-мәдени мұра объектілерін қорғау және пайдалану туралы» заңының 30-бабында көрсетілген.

Атырау облысы шынымен де көне ескерткіштерге бай. Түрлі деректерге сүйенсек, өңірде скиф-сармат және темір дәуірлерінен қалған мыңнан астам қорған болуы мүмкін. Кейбіреулері б.э.д. V ғасырға тиесілі патша қорғандары. Орталық жыл сайын экспедициялар жасап, бұрыннан белгілі нысандардың жағдайын бақылайды. Табылған заттар расталса, олар мемлекет қорғауына алынады.

Дегенмен, кейбір тұрғындар бұл сүйектер көне болмауы мүмкін деген балама пікірлерді де алға тартуда. Әсіресе, 1990-жылдардың қиын кезеңдерін және жақын маңдағы Құлсары қаласының қылмыстық беделін ескерсек, бұл болжам да назардан тыс қалмауы тиіс.

Бұл табылған сүйектердің тарихи маңызы бар ма, жоқ па – бұған жауаптан гөрі сұрақ көп. Бір қызығы, мұндай олжалар қазба жұмыстары басталғанға дейін емес, кейін ғана анықталып жатыр. 

Анастасия ШЕРСТЯНКИНА

Әлеуметтік желіден алынған бейнежазба