​Қазақстан мен ОПЕК+ елдері мамыр айында мұнай өндіруді арттыруға келісті

Қазақстан және ОПЕК+ елдері 2025 жылдың мамыр айынан бастап мұнай өндіру көлемін арттыру туралы келісімге келді. Бұл шешім  альянс мүшелерінің 3 сәуірде өткен онлайн-кездесуінің нәтижесінде қабылданды. Келісімге Сауд Арабиясы, Ресей, Ирак, БАӘ, Кувейт, Қазақстан, Алжир және Оман елдері қатысты.

Мамыр айынан бастап сегіз ел мұнай өндіруді тәулігіне 411 мың баррельге арттыруды жоспарлап отыр. Бұл шешім нарықтағы тұрақты жағдай мен оң болжамдарға негізделген. Сонымен қатар, өндіріс көлемін арттыру қарқыны нарықтағы жағдайға байланысты тоқтатылуы немесе қайта қаралуы мүмкін.

ОПЕК+ елдері 2024 жылдың қаңтарынан бастап артық өндірісті өтеу міндеттемесін де растады. 2025 жылдың 15 сәуіріне дейін елдер жаңартылған өтемақы кестелерін ОПЕК хатшылығына ұсынуы тиіс.

Келесі ОПЕК+ отырысы 2025 жылдың 5 мамырында өтеді, онда маусым айына арналған өндірістік квоталар туралы шешім қабылданады. Жыл соңына дейін нарық жағдайын бағалау және міндеттемелерді орындау деңгейін талқылау үшін ай сайын кездесулер жоспарланған.