Ақтаудағы ұлттық киім фестивалі Гиннестің әлемдік рекордын орнатуды жоспарланып отыр​

Ұлттық мәдениетті насихаттауға арналған фестиваль Ақтау қаласында Наурыз мерекесіне орай өтеді. Ал қатысу үшін 5500 адам тіркеліп үлгерген. «Best Fest Nauryz» фестивалі аясында «Қазақ ұлттық киімін киген адамдардың ең көп жиналуы» номинациясы бойынша Гиннестің әлемдік рекордын орнатуды жоспарланып отыр, деп хабарлайды otpannews.kz.

Іс-шараның мақсаты – қазақ халқының бай мәдени мұрасын көрсету, ұлттық дәстүрлерге назар аудару және қоғам бірлігін нығайту. 

Мереке ежелгі әдет-ғұрыптар мен заманауи үрдістерді біріктіріп, ұрпақтар сабақтастығының символына айналмақ.

Қазіргі уақытта тіркелген қатысушылардың қатысуын растау жүргізіліп жатыр. Басқа қалалардың қатысушылары немесе әртүрлі себептермен қатыса алмайтындар тізімнен шығарылып, орындары ауыстырылады.  

22 наурызда Ақтауға Лондоннан Гиннестің рекордтар кітабының ресми өкілдері келіп, рекордты бекітеді. Сонымен қатар, бұл фестиваль ұлттық тауарлар мен қолдан жасалған бұйымдарды ілгерілету үшін бірегей платформа, сондай-ақ қазақ дәстүрін бүкіл әлемге таныстыру мүмкіндігі болмақ. Басты міндеттердің бірі ұлттық костюм мен тарихи мұраны көрсету арқылы Қазақстанның туристік тартымдылығын арттыру болып отыр. 

«Best Fest Nauryz» фестивалі 22 наурызда сағат 09:00-ден 12:00-ге дейін Ақтау қаласының 15-шағын ауданындағы Амфитеатр алаңында өтеді.

Тіркелген қатысушылар 19-21 наурыз аралығында Ақтау қаласы, 6-шағын аудан, жастар үйі ғимаратынан 10:00-ден 17:00-ге дейін нөмірі бар білезіктерді ала алады. 

 Ал білезікті алған қатысушылар 22 наурызда қоғамдық көлікпен тегін жүре алады. 

Шараның негізгі талаптары:

22 наурыз күні сағат 09:00-ден бастап қатысушылар рекорд орнатылатын аумаққа кіре бастайды.

Қатысушы сайтта ұсынылған каталогқа сәйкес қазақ ұлттық киімін киіп келуге тиіс. Дәстүрлі костюмдердің заманауи үлісіне де рұқсат бар. 

Сағат 11:00-де алғашқы гонг соғылады. Гиннес рекордтар кітабы өкілдерінің айтуынша, бұл қатысушыларды санауының басталғанын білдіреді. Санау кезінде қатысушылар өз орындарында тұруы керек. Ал соңғы гонг соғылғанда санау аяқталады.

Гиннес рекордтар кітабының штаб-пәтері белгілеген барлық талаптар толық орындалған жағдайда рекорд сертификаты сол жерде беріледі.

Іс-шара аяқталғаннан кейін қатысушылар қауіпсіздік шараларын сақтай отырып, алаңнан кетуі керек.

Бұл күн әлемге қазақ мұрасы, мәдениеті, тағамдары мен қолөнері туралы баяндайтын маңызды оқиға болмақ. Гиннес рекордын орнату Қазақстанның халықаралық беделін арттырып қана қоймай, туризм мен ел экономикасының дамуына үлес қосады. Бұл іс-шара қазақ халқының бірегей ерекшелігін ашатын тарихи кезең болмақ.

Жобаның бас демеушісі – «BS Holding» құрылыс компаниясы. Ұйымдастыру бойынша серіктес – Маңғыстау облысының әкімдігі.