​АМӨЗ-дің алау қондырғысында жалын байқалды: техникалық процесс пе, әлде ақау ма?

12 наурыз күні сағат 20:00 шамасында Атырау мұнай өңдеу зауытының алау қондырғысынан жалын байқалды. "АЖ" тілшісі бұл техникалық ақау ма, әлде шығарындыларға байланысты ма, анықтаған еді.

Зауыттың баспасөз қызметі ақаулар тіркелмегенін хабарлады.

- Зауыт қалыпты жұмыс істеп тұр, мұнай өңдеуде ешқандай үзіліс жоқ, - деді АМӨЗ баспасөз хатшысы Жандос Темірғалиев. Ол алаудың жануы туралы толығырақ ақпаратты кейін беруге уәде берді, бірақ жарияланған уақытта ешқандай жауап болмады.

Біз түсініктеме алу үшін экология департаментіне хабарластық.

- Алау қондырғысына CCR қондырғысынан ВСГ  жіберілуде. Себебі – К-102 компрессорларының біріне техникалық қызмет көрсету жұмыстары жүргізілуде. Жұмыстар жексенбіде аяқталады, содан кейін ВСГ тұтынушыларға жіберіледі. Бұл апаттық жағдай емес, жай ғана сутегі жанып жатыр, – деп түсіндірді департаменттің баспасөз қызметі.

Түсінікті болу үшін, ВСГ – сутекті газ, ал CCR – катализаторды үздіксіз регенерациялау және бензол алу блогы бар каталитикалық риформинг қондырғысы екенін атап өтеміз.

Айнұр САПАРОВА