В Атырау -1 
3 наурызда қала тұрғындары мен белсенділері 1 сәуірден бастап Атырау облысында тауарлық газға тарифті көтеру мәселесі бойынша QazaqGaz Aimaq басшылығын тыңдау үшін «ҚазТрансОйл» ғимаратына жиналды. Алайда тыңдау дауға ұласты.
Тыңдаудың ұйымдастырылуы да, тарифті көтеру идеясы да белсенділердің көңілінен шықпады. Залда талас қызып, көпшілік тыңдауды Абай орталығында өткізуді талап етті.
«Аналарға көмек» үкіметтік емес ұйымының жетекшісі Сандуғаш КУКЕНОВАНЫҢ айтуынша, қатысушылардың жартысы компания қызметкерлері. Кездесудің ұйымдастырылуына облыстық мәслихат депутаты Арман ХАЙРУЛЛИН наразылық білдірді:
— Бүгін жергілікті атқарушы органдардың өкілдерінің ешқайсысы шақырылған жоқ. Өткізілетін орын ыңғайсыз, залдың акустикасы нашар, жиналғандарда микрофон да жоқ. Халықтың уәжі тыңдалмады, - деді ол.
ТМРКД төрағасы Арман ӨТЕГЕНОВ қоғамдық талқылауды өткізу ережесі бойынша кейінге қалдыруға болмайтынын айтты. Газ кәсіпорнының өкілдері тарифті көтеру шығынды өтеу үшін қажет екенін алға тартты.
Қатысушылардың бірі Дидар ХАМЗИН: «Тұрғындар жарық тарифін көтеруге қарсы болды, бірақ монополистер көтерді, тұрғындар су тарифін көтеруге қарсы болды, бірақ олар көтерді. Енді газ де солай боп тұр», - деді.
1 сәуірден бастап тауарлық (табиғи) газға тарифті: тұтынушылар үшін 16%-ға, заңды тұлғалар үшін 7%-ға, басқа санаттар үшін 4%-ға көтеру жоспарлануда.
Бірақ белсенділер алдымен компания шығындарының ашықтығын талап етті. Олар кәсіпорын тарифті көтермес бұрын кірісі мен шығысы туралы есеп беруі керек, сонымен қатар әкімдікпен тыңдау мәселесін келісуі керектігін айтады.
ТМРКД төрағасы Арман Өтегенов жергілікті атқарушы органдар шақырылғанын айтты, бірақ оларда залда болмады. Ақырында ол компания өкілдерімен бірге жиналғандармен қоштаспастан залдан шығып кетті.
Кейін өткізілген тыңдаудың мәртебесін білу үшін Өтегеновке хабарластық. Оның айтуынша, тыңдау өткізілді деп танылған. ТМРКД шешімі наурыз айының соңында белгілі болады.
Айнұр САПАРОВА