​Қалың тұман: Алматы-Өскемен жолында 18 көлік соқтығысты

ҚазАвтоЖол “Алматы-Өскемен” жолында орын алған жол-көлік оқиғасы туралы шұғыл ақпарат таратты. 

2025 жылғы 15 қаңтар сағат 07:30 шамасында “Алматы-Өскемен” автожолының 28 шақырым учаскесінде (“Алматы-Қонаев” бағытында) 18 автокөліктің қатысуымен жол-көлік оқиғасы орын алды. Авария қалың тұман кезінде болды.

Алдын ала мәліметтер бойынша жүргізушілер алдағы жол нашар көрінсе де жылдамдық режимі мен қауіпсіз арақашықтықты сақтамауы салдарынан аталмыш оқиға орын алды. 

Оқиға болған жол учаскесі ІА техникалық санатқа жатады, 6 жолақты. Жолдың жүру бөлігі құрғақ, ақаусыз және бөгде заттар болмаған.

Жол-көлік оқиғасы нәтижесінде зардап шеккендер мен қаза тапқандар жоқ. Қосымша мәліметтер анықталуда.

Қазіргі таңда жол бойынан 18 көліктің 16-сы шығарылды. Екі көлік бөлгіш жолақтың бойында эвакуатор қызметін күтуде.