«Полицейлерге қатысты зорлық-зомбылық». Антикор Шерзат Полаттың әкесіне қатысты қылмыстық істі тергеп жатыр

Ішкі істер министрлігі Informburo.kz сайтының марқұм Шерзат Полаттың әкесі Қаржаубай Нұрымовтың үстінен қозғалған қылмыстық іс қандай айыппен тергеліп жатқаны туралы сауалына берген жауабында хабарлады.

"Бұл адам қоғамдық орында заңсыз әрекеттер жасаған, сондықтан оны ұстау туралы шешім шығарылды. Полиция қызметкерлеріне күш қолданамын деп қорқыту фактісі бойынша қылмыстық іс қозғалып, іс әрі қарай тергеу үшін Сыбайлас жемқорлыққа қарсы іс-қимыл агенттігінің Алматы облыстық департаментіне берілді», - деп хабарлады министрлік.

Сондай-ақ, облыстық прокуратура Нұрымовқа қатысты сотқа дейінгі тергеудің сыбайлас жемқорлыққа қарсы іс-қимыл департаментіне жіберілгенін хабарлады. Дегенмен, неліктен полицейлерге қатысты зорлық-зомбылық фактісін Сыбайлас жемқорлыққа қарсы іс-қимыл агенттігінің тексеретіні айтылмайды.

Бұған дейін облыстық полиция департаменті Нұрымовтың үстінен бөтеннің мүлкіне қасақана зиян келтіргені үшін қылмыстық іс қозғалғанын хабарлаған болатын.

«10 желтоқсанда Еңбекшіқазақ ауданына қарасты Азат ауылында орын алған заңсыз әрекеттердің салдарынан автокөлік иесіне материалдық залал келтірілгені анықталды. Бұл әкімшілік жауапкершілік шегінен айтарлықтай асып түсіп, әрекетті қылмыстық жауапкершілікпен саралауға әкеп соқтырады», - делінген ведомство хабарламасында.