​Павлодар мұнай-химия зауыты шығын көлемін 3,5 млрд теңгеге қысқарта алады​

Павлодар мұнай-химия зауыты Lean 6 Sigma әдіснамасын енгізу нәтижесінде шығын көлемін 3,5 млрд теңгеге қысқарта алады, деп хабарлайды "Қазмұнайгаз" Ұлттық компаниясының баспасөз қызметі. 

«ҚазМұнайГаз» ҰК АҚ цифрлық даму департаментінің өкілдері Санкт-Петербург қаласында Lean 6 Sigma жыл сайынғы конференциясына қатысты. 

Конференцияға қатысушылар операциялық тиімділікті арттыру, мұнай-газ секторында инновациялар енгізу және Lean 6 Sigma (LSS) әдіснамасын қолдану мәселелерін талқылады, сондай-ақ өндірісті цифрландыру бойынша шығын көлемін қысқартуға бағытталған жобаларды іске асыру тәжірибесімен алмасты.

ҚМГ кәсіпорындарында LSS қолдану өз нәтижесін беруде. Павлодар мұнай-химия зауытында (ПМХЗ) процестерді біріктіретін, олардың ашықтығын арттыратын және шығындарды азайтуға ықпал ететін құрал жасалды. 

Бұл жобаларды іске асыру зауытқа 3,5 млрд теңге үнемдеуге мүмкіндік береді.  

2024 жылдың қараша айынан бастап Атырау мұнай өңдеу зауытында дәл осындай жұмыс басталды. ҚМГ 2025 жылы өндірістік процестерді жақсартып, шығындарды азайтуды жалғастыру үшін LSS тәсілін басқа еншілес кәсіпорындарға таратуды жоспарлап отыр. 

Анықтама: Lean 6 Sigma әдіснамасы — үнемді өндіріс (Lean) және алты Сигма (6 Sigma) принциптерін біріктіретін бизнес-процестерді жақсартудың құрылымдық тәсілі. Бұл әдіснама шығындарды болдырмау және процестердің құбылмалығын азайту арқылы тиімділікті арттыруға, шығындарды азайтуға және өнім немесе қызмет сапасын жақсартуға бағытталған.