В Атырау
-2 
Экология министрлігі Ақмола және Атырау облыстарындағы төтенше экологиялық жағдай немесе экологиялық апат аймағы деп жариялау болжанған аумақтарды зерттеу үшін комиссия құруды ұсынды, деп хабарлайды Власть.
Ведомстводағылар Ақмола облысының әкімдігіне мұндай комиссия құру «мүмкіндігін қарастыру ұсынысымен» хат жолданғанын нақтылады.
2022 жылы «Власть» Ақмола облысындағы Ақсу ауылы тұрғынының бір жарым жыл бойы мектептердің бірінде радон деңгейінің асып кеткенін дәлелдеген хикаясын айтып берді. Ғалымдар да ауылдың бүкіл аумағын зерттеу қажеттігін мәлімдеген еді.
Сонымен бірге, Экология министрлігі «Власть» сауалына жауап ретінде биылғы көктемде зерттелген аумақтарда гамма-сәулеленудің баламалы дозасы аспағанын хабарлады. Радиологиялық өлшеулерді облыстық экология департаменті, ал дозиметриялық бақылауды «Ұлттық сараптама орталығының» Степногорск филиалы жүргізді.
Сондай-ақ, Экология министрлігі Атырау қаласының тұрғындарынан келіп түскен шағымдарға байланысты «Атырау облысы әкімдігінің жанынан комиссия құру ұсынылды» деп хабарлады.
Осы жылдың шілде айында атыраулық белсенді Макс Боқаев Атырау қаласы мен Атырау қалалық әкімшілігіне қарасты барлық ауылдық округтердің аумағын төтенше экологиялық жағдай немесе экологиялық апат аймағы деп тану үшін комиссия құруды талап етіп, петиция құрған болатын. Петиция модерациядан өтпеді. Белсенді петицияда он жылдан астам уақыттан бері қала мен қалалық әкімшілікке қарасты ауылдық округтердің аумақтары түрлі өндірістермен ауқымды ластанып келе жатқанын айтады.
Бұдан басқа, Экология министрлігі осы жылдың сәуір айынан бастап Ұлытау облысының Жезқазған, Сәтпаев қалаларындағы, Ұлытау ауданындағы қоршаған ортаның, тұрғындардың денсаулығының жай-күйін бағалау бойынша зерттеу жұмыстары жүргізілгенін хабарлады. Жұмысты «Экосервис-С» ЖШС жүргізген. Мемлекеттік сатып алулар порталының мәліметінше, жұмысты жүргізу келісім-шарты 4 желтоқсанда орындалған.
Зерттеудің аралық нәтижелері бойынша ауаның ластану деңгейінің жоғары екені, ал судағы темір мен басқа да хлоридтердің үлес салмағы рұқсат етілген шектен асып кеткені хабарланды. Денсаулық сақтау министрлігінің, сондай-ақ Білім және ғылым министрлігінің қорытындыларымен аумақты тексеру материалдары мемлекеттік экологиялық сараптама жүргізу үшін Экология министрлігіне беріледі.