Қырғыз – Өзбек шекарасындағы қақтығыстан кісі қаза болды

Айыр қалпақты ағайындардың айтуынша, Жетізағара шекара отраядына жақын маңда кеше күндіз қырғыздың үш шекарашысы өзбекстандық екі әріптестерінің шекара сызығын заңсыз кесіп өткендігін анықтайды. Олардың тәртіпке бағынбауынан оқиға ушығып, іс насырға шабады. Нәтижесінде, өзбек шекарашылары алдымен көршілерінің жағасына жармасып, кейіннен бірінші болып оқ атады. Салдарынан өзбек шекарашысының бірі мерт болып, екіншісі дене жарақатын алады. Ал қырғыз елінің шекарашыларына ешбір зақым келмеген.
Ал өзбек елінің БАҚ құралдары бұл оқиғаға қатысты мүлдем кереғар мәліметтер жариялауда. Мысалы, Подробно.Uz сайты: «Бүгін Наманган облысындағы шекара бекетінде тағы бір кезекті қанды оқиға орын алды. Бұған әдеттегіше ішімдікке сылқия тойып алған қырғыз шекарашылары басты себеп болуда. Олар қаруланған күйде біздің жерімізге баса көктеп кіріп, шекарашыларымызға ескертусіз оқ атқан. Нәтижесінде, бір өзбек әскери қызметкері көз жұмып, екіншісі ауыр жағдайда ауруханаға түсті. Дәрігерлердің айтуынша, қазіргі кезде оның өмірі қыл үстінде» деп жазады.
Естеріңізге сала кетейік, өзбек–қырғыз шекарасындағы әскери қызметкерлер қақтығысы жиі орын алып тұруы дағдыға айналған. Әдетте, екі ел мамандары бір-бірін айыптап жатады. Ал Қырғыз Сыртқы істер министрінің орынбасары Асқар Бешимовтың мәліметіне сүйенсек, соңғы екі жыл ішінде олар Өзбекстанға шекара маңында орын алатын қақтығыстарға қатысты 21 нота жолдаған көрінеді.
Бүгінде екі ел жерінің шектесу қашықтығы 1 378 шақырымды құрайды. Оның ішінде ондаған жер телімдерінен құралған жалпы ұзындығы 370 шақырым болатын шекара сызығы күрделенген, даулы мәселеге айналып отыр.
Дереккөз: Baq.kz