Атырауда ақынның 85 жылдығына арналған «Фариза - рух жанартауы» салтанатты кеші өтті

Махамбет атындағы Академиялық қазақ драма театрында Мемлекет және қоғам қайраткері Ф.Оңғарсынованың  85 жылдығына арналған «Фариза - рух жанартауы» салтанатты  кеші өтті, деп хабарлайды облыстық мәдениет басқармасы. 

Жиналғандар  әлқиссасында Фариза Оңғарсынованың өмірі мен шығармашылығына арналған көрмені тамашалады.

Іс- шара «Фариза -рух жанартауы» деп аталған театрландырылған музыкалық-поэтикалық- мультимедиалық қойылымнан басталды.

Жауынгер жыраулар мекенінде туып, ғасырлар жырымен сусындап өскен Фариза Оңғарсынованың сиқырлы қаламынан өрбіген жырлар төгілді,  сөзіне жазылған әндер шырқалып, Махамбеттің күйі шертілді.

Ақын рухына арналған әдеби кеште Қазақстан Республикасының Президенті Қасым-Жомарт Кемелұлының ықыласты құттықтауын жеткізіп, Атырау облысының әкімі Серік  Шәпкенов сөз сөйледі.

Ат арытып арнайы келген Қазақстан Жазушылар Одағының Басқарма төрағасы Мереке Құлкенов, көрнекті әдебиеттанушы, Мемлекет және қоғам қайраткері, ҚР Мемлекеттік сыйлығының лауреаты Сауытбек Әбдірахманұлы, «Алаш» Халықаралық әдеби сыйлығының иегері Ақұштап Бақтыгереева, Абай атындағы Мемлекеттік сыйлықтың иегері Светқали Нұржан Фариза ақын жайлы ойлы толғам,  жылы естеліктерімен бөлісті. 

Осылайша, туған елінің алғаусыз махаббатына бөленген поэзия падишасының жырлары уақыт өлшеміне сыймайтын кеңістіктің төрінде шалқыды. Атырау аспанын ән мен жырға бөледі. Фариза Оңғарсынованың салтанатты, сұлу жыр керуені халқымен бірге келешек ғасырларға бет алды.