​Атырауда педагогика қызметкерлерінің тамыз кеңесі өтті

Атырау облысында «Digital Kazakhstan: жаңа замандағы білім беру» тақырыбында білім беру саласы қызметкерлерінің дәстүрлі тамыз кеңесі өтті. Жиынға аймақ басшысы Серік Шәпкенов қатысты, - деп хабарлайды облыс әкімінің баспасөз қызметі.

Кеңесте Серік Шәпкенов ұстаздарға  кәсібіне адалдығы мен өскелең ұрпақты тәрбиелеу ісіндегі қажырлы еңбегіне ризашылығын білдірді. Кейі мұғалім жеке тұлғаны ғана емес, бүкіл қоғамды қалыптастыратын тұлға екенін айтып, саланың инфрақұрылымын дамыту мәселесіне тоқталды.

– Мемлекет басшысы Қасым-Жомарт Кемелұлы Тоқаев ұлағатты ұрпақ тәрбиелеу аса жауапты әрі күрделі екенін атап өтіп, мұғалімнің еңбегін лайықты бағалауды маңызды міндет етті. Шәкірт тәрбиелеуде сіңіріп жүрген еңбегіңізге алғыс білдіремін. Балаларға сапалы білім беруді қамтамасыз ету үшін бірнеше жоба қолға алынды. Бәріңізге мәлім, былтыр екі заманауи «BINOM» мектебі ашылды, қазір осындай тағы екі мектептің салу жоспарда тұр. Президент тапсырмасымен «Жайлы мектеп» ұлттық жобасы аясында облыста 12 мектеп салынады, қазір тоғызының құрылысы жүріп жатыр.  Оқу жылының басында екі мектеп есігін ашпақ. Сонымен қатар, білім беру нысандарын жаңарту жұмыстары жалғасуда, - деп атап өтті С.Шәпкенов.

Жиын барысында білім беру саласын материалдық-техникалық қамтамасыз ету, заманауи технологиялар мен жасанды интеллектті қолдану, кадрлық әлеуетті дамыту, елдімекендер мен тұрғын үй алаптарын мектептермен және балабақшалармен қамтамасыз етуге қатысты мәселелер  талқыланды. Сондай-ақ жаңа оқу жылына арналған жоспарлар мен міндеттер айтылды. Тамыз конференциясына өңірдің білім беру саласының 500-ден астам қызметкер қатысты.

Облыстық білім беру басқармасының басшысы Марат Әбуов саладағы биылғы өзгерістерді айтты.

–  Жаңа оқу жылында 16 мыңнан астам оқушы мектеп табалдырығынан аттайды. Биыл 12 мектепте күрделі жөндеу жұмыстары басталды. Жеті білім беру нысаны жөндеуден өтті,  бес мектепте жұмыстар осы жылдың соңына дейін аяқталады, - деді М.Әбуов.

Конференцияда облыс әкімі еңбегі еленген ұстаздарды «Білім беру ісінің құрметті қызметкері», «Ы.Алтынсарин» және «Еңбек ардагері» төсбелгілерімен марапаттады.