«Атырау – Орал» жолындағы жөндеу жұмыстарының қарқыны қандай?

Батыс Қазақстан облысында республикалық маңызы бар «Атырау – Орал» автомобиль жолының 189–249 шақырымдары аралығында орташа жөндеу жұмыстары жалғасуда. Учаскенің ұзындығы 60 шақырымды құрайды.

ҚазАвтоЖолдың мәліметіне сай, бүгінге дейін жолдың ескі бетін алып және ірі түйіршікті асфальтбетон қабатын төсеу жұмыстары толық аяқталып, 60 шақырымды қамтыды. Ал ұсақ түйіршікті асфальтбетон қабатын төсеу жұмыстары 33 шақырымда орындалды.

Сонымен қатар жол негізін суық жонғылау әдісімен нығайту жұмыстары 20 шақырымда жүргізіліп, жол жиектерін нығайту жұмыстары 10 шақырымда атқарылды.

Құрылысқа 49 бірлік арнайы техника мен 47 маман жұмылдырылған.

Жолшылардың айтуынша, бұл жұмыстардың нәтижесінде жолдың техникалық жағдайы жақсарып, жол қозғалысының қауіпсіздігі артады және жүргізушілер үшін қолайлы жағдай жасалады.