![](https://f.azh.kz/news-kaz/071/012/1.jpg)
Ресейдегі компьютерлерде YouTube жүктеу жылдамдығы осы аптаның соңына дейін 40%-ға дейін, ал келесі аптаның соңына дейін 70%-ға дейін төмендеуі мүмкін. Бұл туралы Мемлекеттік Думаның ақпараттық саясат, ақпараттық технологиялар және байланыс жөніндегі комитетінің төрағасы Александр Хинштейн өзінің телеграм-арнасында жазды, деп хабарлайды Ulysmedia.kz.
Оның айтуынша, бұл шара тек YouTube-тың десктоп нұсқаларына қатысты болады. Хинштейн YouTube-тың "нашарлауын" ресейлік заңнаманы бұзуына байланысты "мәжбүрлі қадам" деп атады.
Хинштейн видеохостингті баяулату ресейлік пайдаланушыларға қарсы бағытталмағанын атап өтті және дәлел ретінде YouTube-қа қарсы шаралар жазда қабылданып жатқанын келтірді.
“Бұл уақытта адамдардың негізгі бөлігі демалыста болады және интернетке шығу үшін мобильді құрылғыларды пайдаланады", – деп түсіндірді депутат.
Хинштейн YouTube айналасында болып жатқан жағдайды "Батыс көзқарасынан өзгеше пікірі бар" блогерлердің, журналистердің және әртістердің арналарын жойып жатқан хостингтің "Ресейге қарсы саясатының салдары" деп атады.
"YouTube-тың Ресейдегі одан арғы тағдыры тек өзіне байланысты. Ресурс әкімшілігі өз саясатын өзгертпесе және біздің заңдарымызды сақтай бастамаса, оны мұнда жақсылық күтпейді", - деді ол.