«Атырау облысы Су арнасының» су құбырлары жаңартылады

Аймақ басшысы Серік Шәпкенов «Атырау облысы Су арнасы» КМК-ға барып, жұмыс барысымен танысты. Мекеме сумен жабдықтау және су бұру қызметтерінің сапасын арттыруға қажетті техникалармен толықты,-деп хабарлайды облыс әкімінің баспасөз қызметі.

Облыс әкімі жаңадан сатып алынған 8 JAC базасындағы вакуум көлігімен, 2 жылжымалы жөндеу шеберханасымен, 3 NEXT базасындағы жылжымалы жөндеу шеберханасы, 5 NEXT Газель бортты автокөлігі, 2 микроавтобус, КАМАЗ базасындағы Илосос көлігімен, Пикап көлігімен, жүк көтергіш және телескопиялық жүк көтергіштермен және қызметтік  5 Нива көлігімен танысты. Мекеме басшысы Мейірім Қалауидің айтуынша, тамызда тағы 10 техника келмек.

Бұдан бөлек,  қызметкерлердің арнайы жұмыс киімдері, қажетті құрылғылар мен құрал-саймандар да жаңартылған.

Серік Шәпкенов берілген техниканы күтіп ұстап, тұрғындарға сапалы қызмет көрсетуді тапсырды. Адам өмірінің басты құндылық екенін айтқан аймақ басшысы жұмыс барысында техникалық қауіпсіздік ережесін қатаң сақтауды талап етіп, арнайы ереже бекітуді тапсырды.

- Тұрғындарға сапалы қызмет көрсету үшін керекті құрал-жабдықты сатып алып бердік. Жұмыстарыңыз оңай емес екенін де білемін. Кейде көп адам тәуекел етпейтін кәріз құдығына түсуге тура келеді. Техникалық қауіпсіздік ережесін сақтауды басты орынға қойыңыздар. Адам өмірі - басты құндылық. Сіздерге барлық жағдайды жасау — бізден, ал ережені сақтау — сізден. Қызметкер қауіпсіздікті сақтамаса, бірінші басшы жауап беретіндей арнайы қағида бекітіңіздер. Кәріз құдығына түскенде уланып, соңы қайғылы аяқталған да жағдайлар кездеседі. Мұндайды болдырмау үшін денсаулық сақтау басқармасымен бірлесіп, мастерлерге алғашқы көмек көрсетуді үйрету керек,-деді С.Шәпкенов.

Бүгінде кәріз желілерін, су құбырларын жөндеу жұмыстары қарқынды жүріп жатыр. Қалада 33,2 шақырым кәріз желісі күрделі жөндеуден өтіп жатыр. Үш кезеңнен тұратын жобаға сәйкес, Сәтпаев көшесі 8 үйдің аумағында апатты жағдайда тұрған кәріз коллекторы жөнделуде.

Қала мен қала аумағындағы елді мекендерде тозығы жеткен кәріз құбыры желілерін жаңартып, техникалық су шығынын азайту үшін 60,1 шақырым құбыр желілерін күрделі жөндеу жұмыстары жүріп жатыр. Алдымен барлығы 30,7 шақырым болатын Құлманов, Сәтпаев, Канцев, М.Өтемісов және Б.Момышұлы көшелеріндегі апатты су құбырлары жөнделеді.

Облыс әкімі жауапты басшылардан  жұмыстардың өндірістік кестеге сай болуын талап етіп, 9 кәріз құбыр жүйесін қайта жаңғыртуды биылдан қалмай аяқтауды тапсырды. Өңір басшысы жүктеген міндеттер қатарында ауыз су желісін автоматтандыру және цифрландыру да бар.