В Атырау +15.1 
Қазақстан Қаржы министрлігі импорт кезінде ең төменгі баға деңгейі белгіленетін тауарлар тізімін едәуір кеңейтті. Тізімдегі тауар кодтарының саны 89-дан 1 030 позицияға дейін өсті.
Ведомствоның жаңартылған бұйрығына сәйкес, тізімге 978 жаңа позиция қосылып, бұрын қолданыста болған 37 код алынып тасталды.
Жаңартылған тізімге не кірді:
Ет және балық: шошқа етінің ұшалары мен жартылай ұшалары, жас, салқындатылған және мұздатылған балық, балық филесі және ысталған балық өнімдері.
Сүт өнімдері: ашытылған сүт өнімдерінің жекелеген түрлері, ірімшіктер, сүт пасталары, пахта және сарысу.
Көкөністер, жемістер және ауыл шаруашылығы өнімдері: пияз, сарымсақ, қырыққабат, саңырауқұлақ, жүзім, өрік, нектарин, жидектер, кептірілген жемістер, сондай-ақ күріш пен дәнді дақылдар.
Азық-түлік өнімдері: ұн, жарма, уыт, маргарин, шоколад, кондитерлік өнімдер және түрлі консервілер.
Азық-түлікке жатпайтын тауарлар: тұрмыстық химия, парфюмерия, косметика, гигиеналық құралдар, киім-кешек, тоқыма бұйымдары, құрылыс материалдары, автокөлік шиналары, пластмасса, металл өнімдері және жабдықтарға арналған қосалқы бөлшектер.
ҚР Қаржы министрлігінің тиісті бұйрығы (2026 жылғы 28 қазандағы №723) 2026 жылғы 14 қарашадан бастап ресми түрде күшіне енеді.