Газадағы жүздеген науқас пен медицина қызметкерінің қайда кеткені белгісіз

Дүниежүзілік денсаулық сақтау ұйымының басшысы Тедрос Гебрейесус Газадағы "Әл-Ақса" ауруханасындағы жүздеген науқас пен медицина қызметкерінің қайда екені туралы ақпарат жоқ екенін айтты, деп жазады Ulysmedia.kz.

Оның айтуынша, Дүниежүзілік денсаулық сақтау ұйымы "Әл-Ақса" ауруханасы маңында әскери іс-қимылдың күшейгені және әлі эвакуациялау туралы бұйрықтар беріліп жатқаны туралы алаңдатарлық хабарламалар алып жатыр.

"Аурухана директорының айтуынша, 600-ден астам науқас пен медицина қызметкерлердің көбі ауруханадан кетуге мәжбүр болды. Қазіргі уақытта олардың қайда екені белгісіз", - деп жазды Гебрейесус X әлеуметтік желісінде.

Ауруханада бес дәрігер ғана қалған.

Палестина анклавы Денсаулық сақтау министрлігінің мәліметінше, Газада 7 қазаннан бері қаза тапқандар саны 22 мыңнан асып, 57 мыңнан астам адам жараланған.

Израиль билігінің соңғы мәліметі бойынша бұл елде 1,2 мыңға жуық адам қаза тапты және 5 мыңнан астам адам жараланған.