Газ қосудағы меморандум мәселесі

Атырауда «ҚазТрансГаз Аймақ» АҚ Атырау филиалының жаңа ережелеріне байланысты жүздеген бизнес нысандары мен тұрғын үйлер газға қосыла алмай отыр. Әңгіме құрылысты аяқтауға және газ құбырын қабылдауға рұқсат құжаттарының тізімі туралы болып отыр.

Жуырда ғана газ тұтынушыларының құқығын қорғау мақсатында құрылған «АтырауГазЭнерджи» қоғамдық бірлестігінің өкілдері бұл мәселені бірінші рет көтеріп отырған жоқ. Жергілікті билік оны шешуге уәде бергенімен, әзірге бәрі де сөз жүзінде ғана. Енді «АтырауГазЭнерджи» бұл мәселе бойынша әлеуметтік желі арқылы Атырау қаласының әкімі Шәкір КЕЙКИН мен ҚР Премьер-министрі Әлихан СМАЙЫЛОВҚА жүгінді. Үндеуде «ҚазТрансГаз Аймақ» АҚ Атырау филиалы 1 шілдеде жариялаған нысанның қосылуға дайындығын тексеру үшін қажетті құжаттар тізбесінде осы ұйымның құзыретіне кірмейтін және кәсіпкерлік субъектілердің құқығын бұзатын бірқатар тармақтар бар екені айтылған.

«АтырауГазЭнерджи» ҚБ өкілі Еркебұлан ТАҒАШЕВТЫҢ айтуынша, олар бірінші кезекте «ҚазТрансГаз Аймақ» АҚ ӨФ-не талап жолдаған. Одан кейін Атырауда Энергетика министрі Алмасадам САТҚАЛИЕВ пен жергілікті тұрғындардың кездесуінде ол министрден газды қосу ережелерін қайта қарауды сұрады. Кездесу нәтижесінде «ҚазТрансГаз Аймақ» ӨФ, Атырау қаласының әкімдігі және монтаждау ұйымдары арасында үшжақты меморандум жасау туралы шешім қабылданды. Алайда, Е.Тағашевтың айтуынша, қала әкімі әзірге қол қоймағандықтан, мәселе шешілмей жатыр.

– Менің Энергетика министрімен кездесудегі сауалымнан кейін «ҚазТрансГаз Аймақ» АҚ ӨФ-ның қазіргі басшылығы газ шаруашылығының монтаждау ұйымдарымен дөңгелек үстелдер ұйымдастырып, осы түйткілді мәселелерді шешуге бағытталған меморандумға қол қою туралы келісім жасалды. Талқылау барысында бір тармақ жергілікті атқарушы органның, атап айтқанда Атырау қаласының сәулет бөлімінің құзыретіне жататыны белгілі болды: әңгіме газ құбырларының сызбаларын кезекшілік картасына енгізу үшін сәулет бөліміне тапсыру қажеттігі туралы болып отыр, - дейді Еркебұлан Тағашев. Оның пікірінше, шын мәнінде бұл әрекет формалды және монтаждау ұйымдарының қызметіне артық кедергі болып отыр, оны жүзеге асыру үшін уақыт қажет.

Бұдан басқа, үндеуде былай делінген: келіссөз барысында «ҚазТрансГаз Аймақ» АҚ өндірістік филиалының басшылығы жақын арада барлық газ тарату желілерін қамтитын газ құбырларының кезекшілік картасы пайдалануға берілетінін мәлімдеді. Осыған орай «АтырауГазЭнерджи» ҚБ өкілдері газ қызметкерлеріне Атырау қалалық сәулет бөлімі талап ететін кезекшілік картасын жүргізуді өз міндеттеріне алуға шақырды.

– Газшылар бұған оң қарап, осы тармақты меморандумға енгізуді сұрады. Осыдан кейін меморандум жобасы Атырау қаласы әкімінің орынбасары Серік НЫСАНБАЕВҚА жолданды. Ол оны бір аптаға жуық қарап, әкім Кейкинге беруге уәде берді, бірақ іссапарға кетіп қалды, - дейді Е.Тағашев. Оның айтуынша, осыдан кейін Шәкір Кейкин мен оның орынбасары Ерболат ОМАРОВПЕН байланысу мүмкін болмаған. – Ерболат Омаров үнемі жиналыстарда болатындықтан, біз онымен кездесе алмай жүрміз. Ал қала әкімі тіптен қабылдамады, дәлірек айтсақ, әкімдіктің кіреберісіндегі күзет алдын ала рұқсатсыз өткізбейді. Атырауда газ қоса алмағандықтан үйлерін жылыта алмай отырған жүздеген отбасына қатысты маңызды мәселені шешу үшін жабық болса, бұл қандай АШЫҚ ӘКІМДІК болғаны? Атырау әкімі үшін қала тұрғындарының өзекті мәселесін шешуден маңызды не болуы мүмкін?

ГАЗ ҚОСУ МӘСЕЛЕСІ ЖӘНЕ ӘКІМ ҚАБЫЛДАУЫНА ҚАЛАЙ ЖАЗЫЛУ КЕРЕК

Түсініктеме алу үшін қала әкімдігінің баспасөз қызметіне хабарласқан едік. Ол жерде мынадай жауап берілді: «Қала әкімі күндік жоспарды (жиналыстарды, маңызды шараларды) алдын ала бекіткендіктен, тұрғындарды кез келген уақытта қабылдау мүмкін емес. Сондықтан тұрғындар 27-10-30 телефоны арқылы немесе жазбаша өтініш қалдырып, арнайы бекітілген уақытта қала әкімінің қабылдауына жазыла алады. «АтырауГазЭнерджи» АҚ ӨФ-ның әлеуметтік желіде жарияланған үндеуіне келер болсақ, бұл үшін «ҚазТрансГаз Аймақ» АҚ ӨФ мекемесі жауап беретінін хабарлаймыз».

Ал «ҚазТрансГаз Аймақ» АҚ ӨФ баспасөз қызметі бізге түсіндірме түрінде егжей-тегжейлі жауап берді: «Филиал, жарияланған «Қосуға дайындығын және берілген техникалық шарттарға сәйкестігін тексеру үшін қажетті құжаттар тізбесі» бойынша тауарлық газды бөлшек саудада сату шартын жасасу үшін тапсырыс берушіге «Сәулет, қала құрылысы және құрылыс қызметі туралы» ҚР Заңының 60-бабы 2-тармағына және Тауарлық және сұйытылған мұнай газын бөлшек саудада өткізу және пайдалану қағидаларының 5-тармағына сәйкес, өз құқықтары мен міндеттері аясында құрылысы аяқталған нысанның құжаттарын ұсынуды сұрайды.

...«Газбен жабдықтау жобасының болуы» талабы қажетті келісімдердің, рұқсаттардың, бекітулердің және т.б. болуын білдіреді. Оларды алу тәртібі, тараптардың жауапкершілігі мен міндеттері «Қазақстан Республикасындағы сәулет, қала құрылысы және құрылыс қызметі» Заңында көрсетілген.

...Техникалық жағынан күрделі емес жобаларды қоспағанда, жобаларды мақұлдау үшін сараптама қажет. Олай болмаған жағдайда құрылыс салуға тыйым салынады және Әкімшілік құқық бұзушылық туралы кодексте көзделген жауапкершілікке тартылады.

«ҚазТрансГаз Аймақ» АҚ өз қызметінде ҚР қолданыстағы заңнамасын басшылыққа алады және заңды тұлға ретінде өз құқықтары, міндеттері мен өкілеттіктері аясында кез келген ережелерді, талаптарды және басқа да жұмыс құжаттамасын (соның ішінде, қосуға дайындығын және берілген техникалық шарттарға сәйкестігін тексеру үшін қажетті құжаттар тізбесін) бекіте алады, оларды өз тарапынан орындап және өз құзыреті шегінде контрагенттер тарапынан орындалуын талап ете алады.

Осы жарияланымды дайындау барысында Еркебұлан Тағашев қоңырау шалып, қала әкімі Шәкір Кейкиннің қабылдауына кіре алғанын, әкімнің жақын арада құрылысты аяқтау үшін құжаттар тізімін қайта қарау және газ құбырын қабылдау туралы меморандумға қол қоятынына сендіргенін айтты.

P.S. Бүгін Еркебұлан Тағашев қала әкімінің меморандумға қол қойғанын хабарлады.

Айнұр САПАРОВА