​Топырақты заңсыз сатқан ЖШС-нен 850 миллионнан астам теңге өндірілді

Атырау облысының мамандандырылған табиғат қорғау прокуратурасымен «Нұрманияз-Атырау» ЖШС-ның кең таралған пайдалы қазбаларды өндіруге рұқсатты пайдалана отырып, 2021-2022 жылдары 88 542 м³ топырақты заңсыз сатқаны анықталды, деп хабарлайды Атырау облысының прокуратурасы.

Рұқсатты беру үшін «Морское» кен орнындағы гидротехникалық құрылыстардың үйіндісін қалпына келтіру туралы мердігерлік шарт негіз болған. Алайда шартта топырақты өзге мақсатта сату көзделмеген.

Облыс әкімдігіне енгізілген прокурорлық қадағалау актісінің нәтижесі бойынша «Нұрманияз-Атырау» ЖШС-дан бұрын берілген рұқсат кері қайтарылды.

Аталған факт бойынша «Нұрманияз-Атырау» ЖШС-дан сотпен 851 млн теңге мемлекетке келтірілген залал өндірілді. Сот шешімі заңды күшіне енді.

Өз кезегінде, прокуратура «жер қойнауы ресурстарына, оның ішінде өңірдің экологиясына зиян келтіргені үшін жауаптылықтың сөзсіз болатынын» ескертеді.