Бейнежазба 30 күн сақталады

- Лесхоз ықшам ауданындағы ауламызға бейнебақылау камерасы орнатылған. Ол жұмыс істей ме, жоқ па, білмейміз. Жақында көршіміздің жайып қойған кірін ұрлап кеткен еді. Ұрыны табуды ұйғардық, өйткені оны өзіміздегі біреулер ұрлады деп күдіктеніп отырмыз. Әрине, полицияның ұрланған кірден басқа да анағұрлым маңызды істері бар, бірақ полицияның аты полиция ғой.

Бізге Атырау облыстық ІІД жедел басқару орталығы бастығының орынбасары Айса ӨТЕПОВ хабарлағандай, Лесхоз ықшам ауданында «Қауіпсіз қала» бағдарламасы бойынша шынымен де камералар орнатылған, қазір жіберу-реттеу жұмыстары жүргізілуде. Бұл жағдайда, сізге Атырау ҚІІБ-на арызбен келуіңіз керек. Бейнекамералардағы жазбалар 30 күн ішінде сақталады, сондықтан осы құқық бұзушылықты әшкерелеуге мүмкіндік бар.