Қазақстан ТМД-ға төрағалық ету миссиясын Қырғызстанға берді

28 қазанда Қазақстан Тәуелсіз Мемлекеттер Достастығына төрағалық ету эстафетасын Қырғызстанға берді, деп хабарлайды Zakon.kz тілшісі.

Қазақстан үкіметінің басшысы Әлихан Смайылов атап өткендей, отырыстың күн тәртібі өзекті және практикалық
құжаттарға толы болды. Олардың қабылдануы Достастық мемлекеттері арасындағы сауда-экономикалық және мәдени-гуманитарлық байланыстарды одан әрі нығайтуға ықпал етеді.

Жақында өткен Астана саммитінде Достастыққа төрағалық ету эстафетасы Қырғыз Республикасына берілетіні белгілі болды. Осыған орай қырғыз достарды осы маңызды және құрметті миссиямен құттықтағым келеді. Әлихан Смайылов

Сөз соңында Премьер-министр делегация басшыларына кездесуге арнайы қатысқандары үшін алғыс айтып, оны ұйымдастыруға көмектескен ТМД Атқару комитетіне алғысын білдірді.

28 қазанда Астанада ТМД Үкімет басшылары кеңесінің отырысы өтті.