Қазақстанда АҚШ-қа қарағанда адамдар өрттен 10 есе жиі қаза табады, деп хабарлады ҚР төтенше жағдайлар министрі Юрий Ильин.
«Егер Қазақстан Республикасында өрттің әр 36-сында адам өлімі тіркелсе, АҚШ-та аталмыш көрсеткіш 10 есе төмен, 360 өртте бір ғана адам қайтыс болады екен, Ұлыбританияда 14 есе, Францияда 27 есе төмен», - деді Ильин сейсенбідегі үкімет отырысында.
Бұл ретте ол атап өткендей, Қазақстанда 2021 жылдың басында 7515 өрт тіркелді, оларда 251 адам көз жұмған, 217-сін күйік шалған және түрлі деңгейде улану жағдайы болған.
Ильиннің айтуынша, Солтүстік Қазақстанда, Ақмолада, Шығыс Қазақстан және Қостанай облыстарында өрт саны мен қаза тапқандар саны орташа республикалық көрсеткіштен екі-үш есе жоғары. Бұл өңірлердегі жағдай барынша күрделі.