Панфиловшылар дивизиясының ардагері ғасырлық мерейтойын атап өтті

Алматы гарнизонының әскери қызметшілері аты аңызға айналған Панфиловшылар дивизиясының ардагері Қайырлы Жоңқабаевқа Қазақстан Республикасы Қорғаныс министрінің атынан 100 жас мерейтойымен құттықтау хатын табыс етті, деп хабарлайды zakon.kz.

Радиоэлектроника және байланыс Әскери институтының әскери оркестрі майдангерге арнап соғыс жылдарындағы әндерді шырқаса, ал курсанттар мен десантшылар әскери оркестрдің сүйемелдеуімен ардагерге қарап сап түзеп, салтанатты маршпен жүріп өтті.

Іс-шараға Алматы гарнизонының, Алматы қаласы қорғаныс істері жөніндегі департаментінің әскери қызметшілері, Радиоэлектроника және байланыс Әскери институтының курсанттары, қалалық әкімшіліктің, Ардагерлер кеңесінің өкілдері, сондай-ақ генерал Панфиловтың немересі Алуа Байқадамова қатысты.

- Осындай салтанатты шараларға қатыса отырып, ардагерлер өздерін назардан тыс қалмайтынын сезінеді. Бейбіт заман үшін қосқан айтулы үлестерін ешқашан ұмытпауымыз керек, - деді Алматы қаласы бойынша Ардагерлер кеңесінің төрағасы Мэлис Шәмпиев.

Ардагер 1921 жылдың 10 қыркүйегінде Шығыс Қазақстан облысы Самар ауданында дүниеге келген. 1941 жылы кыркүйек айында Панфилов дивизиясы 23-ші гвардиялық полктің қатарына әскерге шақырылған.
Майдангердің жауынгерлік жолы сан қырлы. Қайырлы Уатайұлы соғыс басталғаннан соғыстың соңына дейін қатысты. 8-ші гвардиялық атқыштар дивизиясының құрамында Кеңес Одағының батыры Мәлік Ғабдуллинмен бір ротада болып, Беларусь, Польша, Эстония елдерін азат етуге қатысқан. 1943 жылы ақпанда Ржевтағы қанды шайқаста жарақат алды. Дрезден түбінде жеңісті қарсы алды.

Ұлы Отан соғысы жылдарында көрсеткен ерлігі мен батырлығы үшін "Қызыл жұлдыз" және "Отан соғысы" ордендерімен, "Ерлігі үшін" және "Мәскеуді қорғағаны үшін" медальдерімен марапатталған.
Соғыс аяқталған соң Самар аудандық атқарушы комитетінде жалпы бөлімнің меңгерушісі, аудандық тұтынушылар одағы жүйесінде басшылық лауазымдарды, Алматыдағы жалпытамақтану жүйесінде шаруашылық есебінің директоры қызметін атқарды. 1983 жылы зейнетке шықты. Бес бала тәрбиелеп өсірді. Олардан 10 немере, 13 шөбере көрді.

Мемлекет басшысының атынан аты аңызға айналған Панфилов дивизиясында соғысқан Қайырлы Жонқобаевты жүз жылдық мерейтойымен құттықтадым. Ардагерге «Еңбегі үшін» төсбелгісі табыс етілді. Ақсақалға зор денсаулық пен амандық тілейміз! pic.twitter.com/JnghbB9OQN
— Бакытжан Сагинтаев (@sagintayev_b) September 10, 2021