Атыраулық әйел алаяқтық жолмен 35 азаматтан 29 млн 300 мың теңгесін алып, қалтасына басқан.
Ол аңғал жандарды Нұрсая мөлтек ауданынан арзан бағада пәтер алып беремін деп арбауына түсірген. Жәбірленушілер Kaspi.kz қосымшасы арқылы алаяқ әйелге ақша аударған. Әрине, олардың ешқандай пәтер ала алмағаны түсінікті. Ол өзінің қызмет құнын 300 мың теңгеден 5 миллион теңгеге дейін бағалаған.
- Қазіргі кезде 32 жастағы күдікті азаматша С.-ға қатысты ҚР ҚК-нің 190-бабына («Алаяқтық») сәйкес тергеу амалдары жүргізіліп, іс сотқа жолданды, - деп хабарлады Атырау облыстық Полиция департаменті.
Атырау облысы Полиция департаменті атыраулықтарға алаяқтардың арбауына түспеуді ескертеді. Деректердің дұрыстығына әбден көз жеткізбей, сенімсіздік білдірмеу керектігін айтады.
Айнұр САПАРОВА