Жыл басынан бері коронавируспен ауыратын 2 мыңнан астам бала анықталды, 12 жастағы бала - жансақтау бөлімінде

Жыл басынан бері Атырау облысында Covid-19 диагнозы расталған 2283 бала тіркелді. Бұл туралы онлайн-брифингте облыстық денсаулық сақтау басқармасы басшысының орынбасары Жанар САДУОВА мәлімдеді.

Стационарларда 141 бала емделді, бұл жалпы санның 6% құрайды. Оның ішінде үшеуі жансақтау бөлімінде емделген. 3 қыркүйектегі ахуал бойынша 10 бала стационарлық ем алуда, оның 1-еуі ауыр халде жансақтау бөлімінде жатыр. Бұл 2009 жылы туған Геолог ауылының тұрғыны. Баланың ілеспе аурулары бар. Ол 31 тамыздан бастап жансақтау бөлімінде жатыр, қарқынды терапиядан өтуде және зонд арқылы тамақтандырылуда. Бүгінде 389 бала амбулаториялық бақылауда, бәрінде ауру симптомсыз немесе жеңіл түрмен өтуде.

Ж.Садуованың айтуынша, жаңа оқу жылына дайындық кезінде медицина қызметкерлері мектептерді аралап, аурудың дабыл қағатын белгілерін біліп, ата-аналарға жеткілікті түсіндіру үшін білім беру ұйымдарының мамандарына семинар өткізген.

Зульфия ИСКАЛИЕВА