Атырау полиция қызметкерлері хабар-ошарсыз кеткен 9 жасөспірімді үйлеріне қайтарды, деп хабарлайды Polisia.kz.
Атырау қаласы Полиция басқармасының 102 операторына өздерінің тұрғын-жайларынан белгісіз бағытқа шығып, хабар-ошарсыз кеткен жасөспірімдер туралы тоғыз хабарлама түскен.
– Аталған оқиғалар бойынша барлық жасөспірімдерді полиция қызметкерлері 2-3 сағат ішінде тауып, ата-анасына табыстады, – деді Атырау облысы Полиция департаментінің бастығы Қамза ҮМБЕТҚАЛИЕВ.
Кішкентай балалардың да жоғалып кеткен жағдайлары орын алды. Мысалы, 1 қыркүйек күні сағат 16:00 шамасында “102” операторына 33 жастағы азаматша қоңырау шалып, “Жилгородок” аялдамасы жанында өзінің 7 жастағы қызы ойнап, белгісіз бағытқа кетіп қалғанын айтып хабарлаған. Аталған хабарлама бойынша полиция қызметкерлері дереу іздестіру жұмыстарына кірісіп, қызды тауып, аман-есен ата-анасына табыстады.
Дайындаған Ләззат ҚАРАЖАНОВА