1 қыркүйекте «Алғашқы қоңырау» шарасы тек 1-сынып оқушылары үшін ата-ананың біреуін қатыстырып ұйымдастырылады. Бұл туралы брифингте облыстық білім беру басқармасының басшысы Сатқан ЕСЕНҒАЛИЕВ айтты. Ал 2-11 сынып оқушыларына «ҚР тәуелсіздік жетістіктері» тақырыбында сынып сағаты өтеді.
Биыл 1-сыныпқа 14 355 бала барғалы отыр. Соның ішінде 76 пайызы қазақ тіліндегі сыныптарда оқуға ниет білдірген. Ал облыс орталығындағы мектептерде 1-сыныпқа 8711 оқушы бармақ, оның ішінде қазақ сыныбына - 6 103 бала, орыс сыныбына - 2608 бала.
Білім беру ұйымдарында бүгінде 14 445 педагог жұмыс жасайды. С.Есенғалиевтің айтуынша, мұғалімдер де, техникалық қызметкерлер де толық екпе алған. Тек қаладағы 100-ге жуық мұғалім мен техникалық қызметкер ауырып қалуына байланысты кезеңі келгенде алады. Ал әзірше мектепке апта сайын ПЦР-тест тапсыру арқылы келіп жасайды.
Барлық мектеп «Ашық» қосымшасына қосылған, жеткілікті мөлшерде медициналық маска, санитайзер, тері антисептиктерімен қамтамасыз етілген.
Жоғары оқу орындарының жатақханаларына да «Ашық» қосымшасы арқылы жіберіледі.
Айнұр САПАРОВА