Кабул әуежайындағы жарылысты ИМ мойнына алды

"Ислам мемлекеті" террористік ұйымы бейсенбі күні Кабулда болған екі жарылысты да мойнына алды, деп хабарлайды centralasian.org.

CNN телеканалының мәліметіне қарағанда, бірінші жарылыс әуежайға кіреберіс маңда, екіншісі әуежайға жақын жерде орналасқан Barron қонақүйі жанында болған. Бұл ақпаратты Пентагон өкілі Джон Кирби растады.

We can confirm an explosion outside Kabul airport. Casualties are unclear at this time. We will provide additional details when we can.

— John Kirby (@PentagonPresSec) August 26, 2021

Ауғанстан денсаулық саласының шенеуніктері жарылыстан кемі 60 адам қайтыс болғанын, 140 адам жараланғанын мәлімдеді. Қаза болғандардың арасында АҚШ әскерінің 12 мүшесі бар.

Reuters агенттігі АҚШ әскеріндегі дереккөзі сілтеме жасап, жарылысты жанкешті жасағанын хабарлаған.

The moment when the explosion occurred at #Kabul airport. pic.twitter.com/m6uB22Yg7p
— Barzan Sadiq (@BarzanSadiq) August 26, 2021

Ауғанстандағы ToloNews телеарнасы жарылыс болған аймақтан ондаған адамның ауруханаға жеткізілгенін айтқан.

Ресми Вашингтон бұл шабуылдың артында "Ислам мемлекеті" террористік тобының Хорасан провинциясындағы өкілдері тұр деген. Жарылыстан бірнеше сағат өткен соң "Ислам мемлекеті" Кабулдағы шабуылды өз мойнына алды.

АҚШ әскерилері Кабулда шабуыл жиілей ме деп қауіптенеді.

Кабул әуежайы маңындағы жарылыс АҚШ, Батыс елдерінің азаматтары мен ауғандар елден кету үшін жанталасып жатқан тұста болды. "Талибан" Ауғанстандағы билікті қайта қолға алған соң елден кетуге бел буған шетелдіктер мен ауғанстандықтар Кабул әуежайына ағылып, дүрлігу басталған.

Бұған қоса, "Талибан" АҚШ пен оның одақтастарына адамдарын 31 тамызға дейін Ауғанстаннан әкетуді талап еткен.

26 тамыз таңертең АҚШ пен оның одақтастары "қолда бар сенімді дәлелдеріне" сүйеніп, Кабул әуежайына террорлық шабуыл жасалу қаупі барын ескерткен. Бірақ бұл ескертуге қарамастан Кабул әуежайында көп адам болған.