Жоғалған фермердің туыстары оның кісі қолынан жазым болғанына сенімді

2 012 рет қаралды

Бейнежазбадан алынған кадр

12 қыркүйекте Құлсары қаласында 50 шақты адам Жылыой аудандық әкімдігінің алдына жиналып,  із-түссіз жоғалып кеткен малшы Нұралы НҰРТІЛЕУОВТІҢ жоғалуына қатысты құзырлы орындар жеткілікті жұмыс жасамай отырғанына наразылығын білдірді.

Естеріңізге салсақ, ол 6 қыркүйекте мотоциклімен жылқыларын іздеп қырға шығып кетіп, қайта оралмаған.

Жиналғандардың дені Нұралының туыстары екен. Олардың қолдарында оның үлкейтілген фотосуреті және «Әділдік орнасын», «Құзырлы органдар жұмыс істесін», «Жылыойдағы бассыздық Елбасына жолдансын», «Қылмыскер табылсын» деп жазылған плакаттар болды. Жиналғандар Нұртілеуовтің тірі еместігін, өйткені оны мал ұрлаушылар жазым еткенін, тіпті, олардың пікірінше, мұны жасаған адамның есімін де айтты.

Бейнежазбадан алынған кадр

- Осы күнге дейін тірі болса өзі келер еді, ақыры ол кісі қолынан жазым болды. Біз бір адамнан күдіктенеміз, ол атақты ұры. Ол қанша ұрлық жасаса да сытылып кете береді, әбден дандайсып кеткен, - дейді туысқан әйелдің бірі шырылдай жылап. 

- Ең болмаса, баламның денесін тауып берсін. Бізге полиция күдіктімен жолықтырамыз деген, бірақ көрсетпей отыр. Егер ұсталса, ол қайда? – дейді жоғалған фермердің 80 жастағы анасы.

-Мен Нұралының інісімін. Полиция егер Нұралының сүйегі табылмаса, қылмыстық іс те қозғалмайды дейді. Күдікті (аты-жөнін атады Л.К.)  бұрын мал ұрлайтын, енді адам ұрлауға көшті, - дейді Қойбағар НҰРТІЛЕУОВ.

Көпшілікті Жылыой ауданының әкімі Халел ЖАМАЛОВ сабырға шақырумен болды.

Кейінірек аудандық полиция бөлімінің бастығы Ерболат ДОСМАҒҰЛОВ жедел топ құрылып, ҚР ҚК 99-бабы («Адам өлтіру») бойынша қылмыстық іс көтерілгенін мәлімдеді.

Жоғалған фермерді іздестіруге тікұшақты жұмылдырса да, әзірге нәтиже жоқ.

Ләззат ҚАРАЖАНОВА

Әлеуметтік желіден алынған бейнежазба

13 қыркүйек, 12:40

Қате таптыңыз ба? Тінтуірмен белгілеп, Ctrl + Enter түймесін басыңыз.

Осы мақала тақырыбына қатысты ой-пікіріңізбен бөлісіп, бейнежазба жолдағыңыз келсе, WhatsApp +7 707 37 300 37 нөміріне және editors@azh.kz поштасына жібере аласыз.